နီပေါနဲ့ တိဘက်မှာ ရေခဲမြစ်ပြိုကျပြီး ရေကြီးမြေပြိုမှုတွေကြောင့် လူ ၂၇၀ ကျော် သေဆုံးကာ ၁,၃၀၀ ကျော် ပျောက်ဆုံးနေ

ဟိမဝန္တာဒေသ နီပေါနဲ့ တိဘက်မှာ ဩဂုတ် ၂၆ ရက်နေ့က ဖြစ်ပွားခဲ့တဲ့ ရေခဲမြစ်ပြိုကျမှုကြောင့် ရုတ်တရက် အလွန်ပြင်းထန်တဲ့ ရေကြီးမြေပြိုမှုတွေ ဖြစ်ပွားခဲ့ပြီး လူ ၂၇၃ ဦး သေဆုံးကာ ၁,၃၀၀ ကျော် ပျောက်ဆုံးနေတယ်လို့ AP သတင်းဌာနရဲ့ ဖော်ပြချက်အရ သိရပါတယ်။

ပျောက်ဆုံးသူတွေထဲမှာ နိုင်ငံခြားသားတွေနဲ့ ဘုရားဖူးတွေ အများအပြား ပါဝင်နေတယ်လို့ အာဏာပိုင်တွေက ပြောပါတယ်။

နီပေါမှာ လူ ၂၇၀ သေဆုံးပြီး ၈၂၆ ဦး ပျောက်ဆုံးနေကာ တရုတ်နိုင်ငံရဲ့ ကိုယ်ပိုင်အုပ်ချုပ်ခွင့်ရဒေသ တိဘက်မှာတော့ ၃ ဦး သေဆုံးပြီး ၅၅၈ ဦး ပျောက်ဆုံးနေတယ်လို့ ဆိုပါတယ်။

ရေကြီးမှုကြောင့် နီပေါမှာ တံတား ဒါဇင်နဲ့ချီ ပျက်စီးပြီး လမ်း ၄၀ ကီလိုမီတာနီးပါး ထိခိုက်ပျက်စီးခဲ့တာကြောင့် ရှာဖွေကယ်ဆယ်ရေး လုပ်ငန်းတွေ အခက်အခဲရှိနေသလို နီပေါစစ်တပ်က ရဟတ်ယာဉ်တွေ အသုံးပြုပြီး ရေဘေးသင့်ဒေသတွေက လူ ၁၀၀ ကျော်ကို ကယ်ဆယ်ထားတယ်လို့ သိရပါတယ်။

နီပေါခရီးသွားလုပ်ငန်းဘုတ်အဖွဲ့ရဲ့ အချက်အလက်အရ ပျောက်ဆုံးနေသူတွေထဲက ၅၁၇ ဦးဟာ နိုင်ငံခြားသားတွေဖြစ်ပြီး အိန္ဒိယနိုင်ငံသား ၁၇၈ ဦးနဲ့ အမေရိကန်နိုင်ငံသား ၆၀ ကျော်အပါအဝင် နိုင်ငံပေါင်း ၃၀ က နိုင်ငံခြားသားတွေ ပျောက်ဆုံးနေတယ်လို့ ဆိုပါတယ်။

တိဘက်ဘက်မှာတော့ ဂျီရွန်နယ်စပ်ဝင်ပေါက်အနီး မြေပြိုမှုကြောင့် လမ်းတွေပျက်စီးခဲ့ပြီး ရွှံ့တွေဟာ ပျမ်းမျှ ၁ မီတာခွဲကျော်အထိ ဖုံးလွှမ်းခဲ့သလို မိုးဆက်လက်ရွာနေတဲ့အတွက် မြေပြိုမှု ထပ်မံဖြစ်ပွားနိုင်တယ်လို့ တရုတ်အာဏာပိုင်တွေက သတိပေးထားပြီး ကယ်ဆယ်ရေးလုပ်ငန်းတွေကိုလည်း အရှိန်မြှင့်လုပ်ဆောင်နေပါတယ်။

အမေရိကန်ဘူမိဗေဒလေ့လာရေးအဖွဲ့ (USGS) က အစောပိုင်းမှာ ငလျင်လှုပ်ခတ်မှုလို့ သတ်မှတ်ခဲ့ပေမယ့် နောက်ပိုင်းမှာ ရေခဲမြစ်ပြိုကျမှုကြောင့် ဖြစ်ပေါ်ခဲ့တဲ့ ၅ ဒဿမ ၂ အဆင့်ရှိ တုန်ခါမှုဖြစ်စဉ် ဖြစ်တယ်လို့ ပြန်လည်သတ်မှတ်ခဲ့ပါတယ်။

ရာသီဥတု ပြောင်းလဲမှုနဲ့ အပူချိန်မြင့်တက်မှုတွေကြောင့် ဟိမဝန္တာ တောင်တန်းဒေသရှိ ရေခဲမြစ်တွေ မတည်ငြိမ်မှု မရှိတော့တာဟာ ဒေသတွင်းက သန်းပေါင်းများစွာသော ဒေသခံတွေနဲ့ အခြေခံအဆောက်အအုံတွေအတွက် ကြီးမားတဲ့ ခြိမ်းခြောက်မှု ဖြစ်နေတယ်လို့ ပညာရှင်တွေက သတိပေးထားပါတယ်။

Ref & Photo; AP