အရံစေတီက ထီးတော်တွေကို ဖြုတ်ခိုးယူတဲ့ အမျိုးသမီးတဦးကို ဖမ်းဆီးရမိ

ရှမ်းပြည်နယ်တောင်ပိုင်း၊ ရပ်စောက်မြို့နယ်၊ အုတ်ကျင်းဘုန်းတော်ကြီးကျောင်းက စေတီတော်ကြီးရဲ့ အရံစေတီက ထီးတော်တွေကို ခိုးယူတဲ့သူကို ဖမ်းဆီးရမိခဲ့တယ်လို့ သိရပါတယ်။

ဩဂုတ်လ ၂၁ ရက် ညနေပိုင်းက အုတ်ကျင်းဘုန်းတော်ကြီးကျောင်းမှာ တည်ထားတဲ့ စေတီတော်ကြီးရဲ့ အရံစေတီက ရွှေထီးတွေကို ဖြုတ်ယူနေတဲ့ အမျိုးသမီးတဦးကို ဒေသခံတွေက တွေ့သွားပြီး ဝိုင်းဝန်းဖမ်းဆီးခဲ့ကြတာလို့ သိရပါတယ်။

"မိန်းကလေးတယောက်က စေတီပေါ်တက်ပြီး အရံစေတီက ထီးတော်တွေကို ဖြုတ်ခိုးနေတာတွေ့လို့ ဝိုင်းဖမ်းကြတာ၊ ကောင်မလေးကလည်း ဝန်ခံတယ်၊ ဝမ်းရေးအတွက် ရောင်းစားဖို့ လုပ်တာလို့ ပြောတယ်၊ ထုရိုက်တာတော့ မလုပ်ကြပါဘူး၊ ရဲလက် အပ်လိုက်ကြပါတယ်" လို့ ဒေသခံတဦးက ပြောပါတယ်။

ရွှေထီးတော်ခိုးယူတဲ့ အမျိုးသမီးဟာ ရပ်စောက်မြို့၊ ဇော်ဂျီရပ်ကွက်က အသက် ၂၅ နှစ်အရွယ် မအိအိဖြိုး ဆိုသူဖြစ်ပြီး ဖြုတ်ယူခံရတဲ့ ထီးတော်တွေကို ပြန်လည်တပ်ဆင်ဖို့ အနေကဇာ ပြန်တင်ထားကြတယ်လို့ သိရပါတယ်။

ခိုးယူသူအမျိုးသမီးကို ရပ်စောက်မြို့မရဲစခန်းမှာ ထိန်းသိမ်းထားပေမဲ့ တိုင်တန်သူမရှိသေးလို့ အမှုဖွင့်လှစ်ထားတာတော့ မရှိသေးဘူးလို့ သိရပါတယ်။