ရရှိထားတဲ့ သတင်းအချက်အလက်တွေအရ ကုလသမဂ္ဂမှာ ဆက်လက်ရှိနေမယ်လို့ သံအမတ်ကြီး ဦးကျော်မိုးထွန်း ပြောဆို

ရရှိထားတဲ့ သတင်းအချက်အလက်တွေအရ ကုလသမဂ္ဂမှာ ဆက်လက်ရှိနေမယ်လို့ သံအမတ်ကြီး ဦးကျော်မိုးထွန်း ပြောဆို

စက်တင်ဘာ ၂၀

အမေရိကန်ပြည်ထောင်စု၊ နယူးယောက်မြို့၊ ကုလသမဂ္ဂ ရုံးချုပ်အနီးမှာ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း ကုလသမဂ္ဂမှာ ဆက်လက်တည်ရှိရေးအတွက် ထောက်ခံချီတက်ဆန္ဒဖော်ထုတ်ပွဲကို စက်တင်ဘာလ ၁၉ ရက်က ကျင်းပခဲ့တယ်လို့ သိရပါတယ်။

အဆိုပါ ထောက်ခံချီတက်ဆန္ဒပြပွဲကို Global Action for Credential Campaign 2026 အဖြစ် Our UN Ambassador HE Kyaw Moe Tun, True Voice of Myanmar ခေါင်းစဉ်နဲ့ ကျင်းပပြုလုပ်ခဲ့တာဖြစ်ပြီး သံအမတ်ကြီး ဦးကျော်မိုးထွန်းနှင့် NUGနိုင်ငံခြားရေးဝန်ကြီး ဒေါ်ဇင်မာအောင်တို့ တက်ရောက်ထောက်ခံစကား ပြောကြားခဲ့တယ်လို့ New York City Burmese Community (NYCBC) က ထုတ်ပြန်ထားပါတယ်။

"ဒီနေ့မှာ လူဦးရေ ၅၀၀ လောက် စုရုံးပြီး ဆန္ဒပြတောင်းဆိုကြတယ်။ ဒီ New York မြို့မှာရှိတဲ့ အထင်ကရလမ်းတွေကို ချီတက်ပြီး ဆန္ဒပြကြတယ်။ မနှစ်ကထက် လူပိုများတယ်။ သံအမတ်ကြီး ဦးကျော်မိုးထွန်းက အရင်နှစ်တွေကလိုပဲ ကုလသမဂ္ဂမှာ မြန်မာနိုင်ငံကိုယ်စားပြုအဖြစ်နဲ့ ဆက်လက်ထားရှိဖို့အတွက်လည်း သတင်းအချက်အလက်တွေ ရရှိထားတယ်ဆိုပြီးတော့ သံအမတ်ကြီးက ပြောသွားတယ်" လို့ ဆန္ဒပြပွဲကို တက်ရောက်ခဲ့သူ တဦးက မြို့တော်ကိုပြောပါတယ်။

ဆန္ဒဖော်ထုတ်သူတွေဟာ ကုလသမဂ္ဂရုံးချုပ်ရှေ့ကနေ နယူးယောက် မြို့လယ်လမ်းမတွေကို ဖြတ်ပြီး ကြွေးကြော်သံတွေနဲ့ ချီတက်ခဲ့ကြကာ ကုလသမဂ္ဂရုံးချုပ်အနီးကို ပြန်လည်ရောက်ရှိလာတဲ့ ဆန္ဒထုတ်ဖော်ကြတဲ့သူတွေကို နယူးယောက်ဒေသခံ အလှူရှင်တွေက နေ့လယ်စာနဲ့ ဧည့်ခံကျွေးမွေးခဲ့ကြတယ်လို့ သိရပါတယ်။

မြို့တော် News Channel