အိန္ဒိယကုန်တင်သင်္ဘော ယီမင်ကမ်းလွန်မှာ တိုက်ခိုက်ခံရပြီး နစ်မြှုပ်သွားမှုအပေါ် အိန္ဒိယ အပြင်းအထန် ရှုတ်ချ

အိန္ဒိယကုန်တင်သင်္ဘော ယီမင်ကမ်းလွန်မှာ တိုက်ခိုက်ခံရပြီး နစ်မြှုပ်သွားမှုအပေါ် အိန္ဒိယ အပြင်းအထန် ရှုတ်ချ

ဩဂုတ် ၅

ယီမင်နိုင်ငံ ကမ်းလွန် ပင်လယ်နီအတွင်းမှာ အိန္ဒိယကုန်တင်သင်္ဘောတစ်စီး တိုက်ခိုက်ခံရပြီး နစ်မြှုပ်သွားခဲ့တာနဲ့ ပတ်သက်လို့ အရပ်ဘက် သင်္ဘောအပေါ် ရန်စမှုမရှိဘဲ တိုက်ခိုက်ခဲ့တဲ့ လုပ်ရပ်အဖြစ် အိန္ဒိယအစိုးရက အပြင်းအထန် ရှုတ်ချလိုက်ပါတယ်။

အမ်အက်စ်ဗွီ ဖိုင်ဇ် နူရီ အိုလီယာ (MSV Faize Noore Oliya) အမည်ရှိ ကုန်တင်သင်္ဘော တိုက်ခိုက်ခံရတာဖြစ်ပြီး အိန္ဒိယနိုင်ငံသား ၁၃ ဦး အပါအဝင် သင်္ဘောသား ၁၄ ဦးလုံးကို ယီမင် ကမ်းခြေစောင့်တပ်က ကယ်ဆယ်နိုင်ခဲ့ကာ မိုခါဆိပ်ကမ်းကို ပို့ဆောင်ပေးခဲ့တယ်လို့ အိန္ဒိယ ရေကြောင်းနှင့် ရေလမ်းကြောင်းဆိုင်ရာ ဝန်ကြီး ဆာဘာနန်ဒါ ဆွန်နိုဝါလ်က ဆိုပါတယ်။

အိန္ဒိယ နိုင်ငံခြားရေးဝန်ကြီးဌာနကလည်း အရပ်ဘက်သင်္ဘောကို တိုက်ခိုက်ခဲ့တာဟာ “အလွန်စိုးရိမ်ဖွယ်ဖြစ်ရပ်” ဖြစ်ကြောင်း ရှုတ်ချခဲ့ပြီး၊ ပင်လယ်နီအတွင်း ကုန်သွယ်ရေးသင်္ဘောတွေကို ပစ်မှတ်ထား တိုက်ခိုက်နေတာတွေကို ချက်ချင်း ရပ်တန့်ရမည်ဖြစ်သလို အပြည်ပြည်ဆိုင်ရာ ဥပဒေများနှင့်အညီ လွတ်လပ်စွာ ရေကြောင်းသွားလာခွင့်ကို အမြန်ဆုံး ပြန်လည်ဖော်ဆောင်ပေးရန် တောင်းဆိုထားပါတယ်။

အဆိုပါ တိုက်ခိုက်မှုကို မည်သည့်အဖွဲ့ကမျှ လက်ချက်ဖြစ်ကြောင်း ထုတ်ဖော်ပြောဆိုခြင်း မရှိသေးသော်လည်း ဆော်ဒီအစိုးရ ကျောထောက်နောက်ခံပြု ယီမင်အစိုးရကတော့ အီရန်နှင့် မဟာမိတ်ဖြစ်တဲ့ ဟူသီအဖွဲ့ရဲ့လက်ချက်ဖြစ်ပြီး ပေါက်ကွဲပစ္စည်းတွေ တင်ဆောင်ထားတဲ့ လှေနဲ့ တိုက်ခိုက်ခဲ့ခြင်းတယ်လို့ စွပ်စွဲထားပါတယ်။

အီရန်က ဟော်မုဇ် ရေလက်ကြားကို ပိတ်ဆို့လိုက်ပြီးနောက် ပင်လယ်ကွေ့ နိုင်ငံတွေဟာ ပင်လယ်နီ ရေလမ်းကြောင်းကို ပြောင်းလဲ အသုံးပြုနေရတာဖြစ်ပြီး ပြီးခဲ့တဲ့လက ဟူသီအဖွဲ့ရဲ့ ရေကြောင်းပိတ်ဆို့မှု ကြေညာချက်ကြောင့် အဆိုပါရေလမ်းကြောင်းမှာ အန္တရာယ် ပိုမိုကြီးမားလာကာ ကမ္ဘာ့ရေကြောင်း ကုန်သွယ်ရေးနှင့် စွမ်းအင်ထောက်ပံ့မှုတွေကိုလည်း ရိုက်ခတ်လျက် ရှိနေပါတယ်။

Ref & Photo; The Independent

မြို့တော် News Channel