ဂျပန်ရဲ့ စစ်ရေးစွမ်းရည်တိုးမြှင့်မှုကို တုံ့ပြန်ဖို့ စစ်ရေးနည်းလမ်းအသစ်တွေ ချမှတ်သွားမယ်လို့ ကင်ယိုဂျုံ သတိပေး

ဂျပန်ရဲ့ စစ်ရေးစွမ်းရည်တိုးမြှင့်မှုကို တုံ့ပြန်ဖို့ စစ်ရေးနည်းလမ်းအသစ်တွေ ချမှတ်သွားမယ်လို့ ကင်ယိုဂျုံ သတိပေး

ဩဂုတ် ၅

ဂျပန်နိုင်ငံက အမေရိကန်လုပ် တိုမာဟော့ ခရုဇ်မစ်ဆိုင်းဒုံး စမ်းသပ်ပစ်ခတ်ခဲ့ပြီးနောက် ဂျပန်နိုင်ငံရဲ့ စစ်အင်အားတိုးမြှင့်မှုကို တုံ့ပြန်တဲ့အနေနဲ့ စစ်ရေးနည်းလမ်းအသစ်တွေနဲ့ ကျင့်သုံးသွားမယ်လို့ မြောက်ကိုရီးယားခေါင်းဆောင် ကင်ဂျုံအန်းရဲ့ ညီမဖြစ်သူ ကင်ယိုဂျုံက သတိပေးပြောဆိုလိုက်ပါတယ်။

မြောက်ကိုရီးယား ဗဟိုသတင်းဌာန (KCNA) ကနေ ထုတ်ပြန်တဲ့ ကြေညာချက်မှာ ကင်ယိုဂျုံက ဂျပန်ဟာ ခံစစ်ပြင်တဲ့ အဆင့်ကနေ ကျော်လွန်ပြီး ကြိုတင်ကာကွယ်တိုက်ခိုက်နိုင်တဲ့ စွမ်းရည်နှင့် ပင်လယ်ရပ်ခြား စစ်ရေးလှုပ်ရှားမှုတွေ ပြုလုပ်နိုင်တဲ့ စစ်တပ်အဖြစ် ပြောင်းလဲဖို့ ကြိုးပမ်းနေတယ်လို့ စွပ်စွဲထားပါတယ်။

ပစိဖိတ်သမုဒ္ဒရာထဲမှာ ပြုလုပ်ခဲ့တဲ့ ချိုကိုင် အဲဂိစ် ဖျက်သင်္ဘောပေါ်ကနေ မစ်ဆိုင်းဒုံး စမ်းသပ်မှုနဲ့ မေလအတွင်း ဖိလစ်ပိုင်မှာ ပြုလုပ်ခဲ့တဲ့ အမေရိကန်ဦးဆောင်တဲ့ ပူးတွဲစစ်ရေးလေ့ကျင့်မှုတွေမှာ ဂျပန် ပါဝင်ခဲ့တာကိုလည်း ကင်ယိုဂျုံက ထောက်ပြဝေဖန်သွားပါတယ်။

ကင်ယိုဂျုံက ဂျပန်နိုင်ငံအနေနဲ့ မိမိတို့ရဲ့ လုံခြုံရေး အရင်ကထက် ပိုမိုခြိမ်းခြောက်ခံနေရပြီဆိုတာကို ခံစားရအောင် မြောက်ကိုရီးယားဘက်က တုံ့ပြန်မှာဖြစ်ပြီး၊ ဒီလုပ်ရပ်တွေအတွက် နောင်တရစေရမယ်လို့ အပြင်းထန်ဆုံး စကားလုံးတွေ သုံးပြီး ပြောဆိုခဲ့ပါတယ်။

ဒါ့အပြင် အမေရိကန်ဟာ ဂျပန်ကို မစ်ဆိုင်းဒုံးတွေ ထောက်ပံ့ပေးတာနဲ့ စစ်သင်္ဘောတွေကို ပြုပြင်ပေးတာတွေ လုပ်ဆောင်ပြီး ဂျပန်ရဲ့ စစ်အင်အား တိုးချဲ့မှုကို နောက်ကွယ်ကနေ ကူညီပေးနေတယ်လို့လည်း ပြစ်တင်ဝေဖန်ထားပါတယ်။

“ဂျပန်ရဲ့ အန္တရာယ်ရှိတဲ့ စစ်ရေးလှုပ်ရှားမှုတွေ နောက်ကွယ်မှာ အမေရိကန်ရှိနေတယ်” လို့ ကင်ယိုဂျုံက ဆိုပါတယ်။

ကင်ယိုဂျုံက ဂျပန်ရဲ့ တာဝေးပစ်နိုင်တဲ့ မစ်ဆိုင်းဒုံး စွမ်းရည်တွေဟာ မြောက်ကိုရီးယားနဲ့ အိမ်နီးချင်းနိုင်ငံတွေကို တိုက်ရိုက် ခြိမ်းခြောက်နေတာကြောင့် ပြုံးယမ်းဘက်ကလည်း စစ်ရေးနည်းလမ်းအသစ်တွေကို ပြင်ဆင်သွားမယ်လို့ ဆိုပါတယ်။

နိုင်ငံရေး လေ့လာသုံးသပ်သူတွေကတော့ မြောက်ကိုရီးယားဟာ ဂျပန်ရဲ့ စစ်ရေးခေတ်မီအောင် ဆောင်ရွက်မှုကို တိုက်ရိုက်လုံခြုံရေးခြိမ်းခြောက်မှုအဖြစ် ပုံဖော်ပြီး မြောက်ကိုရီးယားရဲ့ လက်နက်ဆန်းသစ်တီထွင်မှုတွေကို တရားမျှတကြောင်း သက်သေပြဖို့ ကြိုးပမ်းနေတာဖြစ်လို့ ဆိုပါတယ်။

ဆိုးလ်မြို့ မြောက်ကိုရီးယားလေ့လာရေးတက္ကသိုလ်က ပါမောက္ခ ရန်မူဂျင်း ကတော့ ကင်ယိုဂျုံရဲ့ ပြောဆိုချက်တွေဟာ မြောက်ကိုရီးယားကို တုံ့ပြန်ဖို့ အမေရိကန်က ဂျပန်ကို ကြားခံအဖြစ်သုံးပြီး စစ်အင်အား မြှင့်တင်ပေးနေတာကို မီးမောင်းထိုးပြဖို့ ကြိုးပမ်းတာဖြစ်တယ်လို့ သုံးသပ်ပြောဆိုပါတယ်။

ဒါ့အပြင် ကင်ယိုဂျုံရဲ့ အခုလို သတိပေးချက်ဟာ နောက်ပိုင်းမှာ မြောက်ကိုရီးယားက ပြုလုပ်လာနိုင်တဲ့ မစ်ဆိုင်းဒုံး စမ်းသပ်မှုတွေနဲ့ ရေအောက်တိုက်ခိုက်ရေး စွမ်းရည် ပြသမှုတွေအတွက် လမ်းခင်းလိုက်တာ ဖြစ်နိုင်တယ်လို့လည်း ကျောင်နမ်တက္ကသိုလ်မှ ပါမောက္ခ လင်းအူးချူးက သုံးသပ်ပြောဆိုထားပါတယ်။

Ref & Photo; Reuters

မြို့တော် News Channel