လိင်ပိုင်းဆိုင်ရာ ပြစ်မှုကျူးလွန်သူတွေကို GPS စနစ်နဲ့ စောင့်ကြည့်ဖို့ ဂျပန်တရားရေးဝန်ကြီးဌာန စမ်းသပ်ပြင်ဆင်

လိင်ပိုင်းဆိုင်ရာ ပြစ်မှုကျူးလွန်သူတွေကို GPS စနစ်နဲ့ စောင့်ကြည့်ဖို့ ဂျပန်တရားရေးဝန်ကြီးဌာန စမ်းသပ်ပြင်ဆင်

စက်တင်ဘာ ၁၆

ဂျပန်နိုင်ငံမှာ ခံဝန်နဲ့ လွတ်ငြိမ်းခွင့်ရထားတဲ့ လိင်ပိုင်းဆိုင်ရာ ပြစ်မှုကျူးလွန်သူတွေကို GPS စနစ်နဲ့ စောင့်ကြည့်စစ်ဆေးသွားမယ့် စမ်းသပ်စီမံချက်တခုကို လာမယ့် ၂၀၂၇ ဘဏ္ဍာရေးနှစ်ကစတင်ပြီး အကောင်အထည်ဖော်ဖို့ ဂျပန်တရားရေးဝန်ကြီးဌာနက စီစဉ်နေတယ်လို့ သိရပါတယ်။

အဆိုပါ စီမံချက်အတွက် လိုအပ်တဲ့ အသုံးစရိတ်တွေကို ၂၀၂၇ ဘဏ္ဍာရေးနှစ် ဘတ်ဂျက်တောင်းခံမှုထဲမှာ ထည့်သွင်းထားပြီးဖြစ်တယ်လို့ တရားရေးဝန်ကြီး ဟီရိုရှီ ဟီရာဂူချီ က စက်တင်ဘာ ၁၁ ရက်နေ့က သတင်းစာရှင်းလင်းပွဲမှာ အတည်ပြု ပြောဆိုထားပါတယ်။

စီမံချက်အရ ပြစ်မှုကျူးလွန်သူတိုင်းကို မဖြစ်မနေ တပ်ဆင်ခိုင်းတာမျိုး မဟုတ်ဘဲ ပါဝင်ဖို့ သဘောတူတဲ့ ကျူးလွန်သူတွေကိုသာ စောင့်ကြည့်သွားမှာဖြစ်သလို GPS ကိရိယာတွေကိုလည်း ခန္ဓာကိုယ်ပေါ်မှာ တပ်ဆင်ထားမှာ မဟုတ်ဘူးလို့ ဆိုပါတယ်။

ဂျပန်နိုင်ငံရဲ့ ပြစ်မှုကျူးလွန်သူများ ပြန်လည်ထူထောင်ရေးဥပဒေအရ ခံဝန်နဲ့ လွတ်လာသူတွေဟာ စမ်းသပ်ကာလ ကြီးကြပ်ရေးအရာရှိတွေရဲ့ ကြီးကြပ်မှုကို မဖြစ်မနေ ခံယူကြရပါတယ်။

အခု အစီအစဉ်သစ်မှာတော့ ခံဝန်နဲ့ လွတ်လာသူတွေရဲ့ တည်နေရာအချက်အလက်တွေအရ ပြစ်မှုနဲ့ ဆက်နွှယ်နိုင်တဲ့ သံသယဖြစ်ဖွယ် အပြုအမူတွေ တွေ့ရှိလာရရင် လူချင်းတွေ့ဆုံ စစ်ဆေးမေးမြန်းတာအပါအဝင် လိုအပ်တဲ့ ထိန်းကျောင်းတည့်မတ်မှုတွေကို ဆောင်ရွက်သွားဖို့ စဉ်းစားထားတာလို့ ဂျပန်တရားရေးဝန်ကြီးဌာနက ဆိုပါတယ်။

အဆိုပါစမ်းသပ်မှုဟာ အမှန်တကယ် ထိရောက်မှုရှိတယ်ဆိုရင်တော့ အပြည့်အဝ ဆက်လက်အကောင်အထည်ဖော်သွားမှာ ဖြစ်တယ်လို့ သိရပါတယ်။

ဂျပန်အစိုးရအနေနဲ့ နိုင်ငံတကာက စနစ်တွေကို နမူနာယူပြီး လိင်ပိုင်းဆိုင်ရာ ပြစ်မှုကျူးလွန်သူတွေကို ကိုင်တွယ်ထိန်းကျောင်းတဲ့ အစီအမံတွေ တိုးမြှင့်ဆောင်ရွက်သွားဖို့ ၂၀၂၃ ခုနှစ် ပြစ်မှုထပ်မံကျူးလွန်မှု ကာကွယ်ရေးစီမံကိန်းမှာလည်း ထည့်သွင်းသတ်မှတ်ထားပါတယ်။

Ref & Photo; The Japan Times

မြို့တော် News Channel