နယူးယောက်က အထက်တန်းကျောင်းမှာ AI နဲ့ လူတူစက်ရုပ် စမ်းသပ်အသုံးပြုမယ့် အစီအစဉ် အပြင်းအထန် ဝေဖန်ခံနေရ
ဇူလိုင် ၂၆
အမေရိကန်နိုင်ငံ နယူးယောက်ပြည်နယ်၊ ဆာလမန်ကာ (Salamanca) အထက်တန်းကျောင်းမှာ လူတူစက်ရုပ်(Humanoid Robot)နဲ့ AI သင်ကြားရေးအကူစနစ်ကို ၂၀၂၆ ခုနှစ် ဆောင်းဦးရာသီကစပြီး စမ်းသပ်အသုံးပြုမယ့် အစီအစဉ်အပေါ် ဆရာ၊ ဆရာမတွေနဲ့ ဒေသခံ အမေရိကန်ဖွား တိုင်းရင်းသားတွေအကြား ဝေဖန်တွေ ပြင်းထန်နေပါတယ်။
ဆာလမန်ကာ အထက်တန်းကျောင်းအပါအဝင် ကျောင်းတွေကို ကြီးကြပ်တဲ့ ကက်တားရောက်ဂတ်စ် ခရိုင် ကျောင်းဘုတ်အဖွဲ့က “ဆယ်လီ” လို့ အမည်ပေးထားတဲ့ လူတူစက်ရုပ်တရုပ်ကို ဒေါ်လာ ၅၇,၅၉၀ (မြန်မာငွေ သိန်း ၁,၂၀၀ ကျော်)နဲ့ ဝယ်ယူခဲ့ခြင်းဖြစ်ပြီး အဆိုပါစက်ရုပ်ကို ထုတ်လုပ်ခဲ့တဲ့ Realbotix ကုမ္ပဏီဟာ အတိတ်က လိင်ဖျော်ဖြေရေးအရုပ်တွေ ထုတ်လုပ်တဲ့ ကုမ္ပဏီတစ်ခုကို ဝယ်ယူခဲ့ဖူးတဲ့ သမိုင်းကြောင်းလည်း ရှိခဲ့ပါတယ်။
ဆာလမန်ကာ ဆရာ၊ ဆရာမများအသင်း ဥက္ကဋ္ဌ လေစီ ပီဘလက်ဒ် က Realbotix ကုမ္ပဏီရဲ့ နောက်ခံ၊ အသုံးပြုမယ့် ဆော့ဖ်ဝဲလ်ရဲ့ လုံခြုံရေးအပြင် ကျောင်းသားတွေရဲ့ အချက်အလက်တွေကို သိမ်းဆည်းမယ့် နည်းလမ်းတွေနဲ့ ပတ်သက်ပြီး အလွန်စိုးရိမ်ကြောင်း ပြောဆိုထားပြီး အစီအစဉ်ကို ခဏရပ်ဆိုင်းထားဖို့ တောင်းဆိုထားပါတယ်။
နယူးယောက်ပြည်နယ် အမျိုးသားဆရာ၊ ဆရာမများသမဂ္ဂ ဥက္ကဋ္ဌ မယ်လင်ဒါ ပီဆန် ကလည်း ဒီအစီအစဉ်ဟာ “လုံးဝ မသင့်လျော်ဘူး” လို့ ဝေဖန်ပြီး ပညာရေးမှာ စက်ရုပ်တွေထက် ကျောင်းသားတွေအတွက် ဂရုစိုက်ပေးနိုင်တဲ့ လူကြီးတွေနဲ့ လူသားအချင်းချင်း ဆက်ဆံရေးက ပိုအရေးကြီးတယ်လို့ ပြောပါတယ်။
ဆာလမန်ကာကျောင်းရဲ့ ကျောင်းသား ၄၀ ရာခိုင်နှုန်းနီးပါးဟာ အမေရိကန်ဖွား တိုင်းရင်းသား တွေဖြစ်ပြီး အတိတ်ကလည်း ဘော်ဒါဆောင်ကျောင်းတွေကြောင့် ယဉ်ကျေးမှု ပျောက်ကွယ်မသွားရအောင် ရုန်းကန်ခဲ့ရတဲ့ သမိုင်းကြောင်းတွေ ရှိခဲ့တာကြောင့် ကျောင်းကို စမ်းသပ်မယ့်နေရာအဖြစ် ရွေးချယ်တာကိုလည်း ဒေသခံ အမေရိကန်ဖွား တိုင်းရင်းသားတွေကြား ဝေဖန်တွေ မြင့်တက်နေပါတယ်။
Realbotix ကတော့ လူပုံစံစက်ရုပ်နဲ့ AI စနစ်ဟာ ဆရာ၊ ဆရာမတွေကို အစားထိုးဖို့မဟုတ်ဘဲ ကျောင်းသားတွေကို AI နဲ့ စက်ရုပ်နည်းပညာတွေ လေ့လာခွင့်ပေးဖို့ ရည်ရွယ်တာဖြစ်တယ်လို့ ပြောဆိုထားပါတယ်။
နယူးယောက်ပြည်နယ် ပညာရေးဌာနကတော့ ကျောင်းသားတွေရဲ့ ကိုယ်ရေးအချက်အလက် လုံခြုံရေးနဲ့ သင့်လျော်တဲ့ ကာကွယ်မှုတွေ မရှိမှာကို စိုးရိမ်ကြောင်း ပြောပြီး နည်းပညာဟာ ဆရာ၊ ဆရာမတွေနဲ့ ကျောင်းသားတွေကို ကူညီပေးနိုင်ပေမယ့် လူသားတွေရဲ့ ဆုံးဖြတ်ချက်နဲ့ တာဝန်ခံမှုကို အစားထိုးမသင့်ဘူးလို့ ဆိုထားပါတယ်။
Ref & Photo; The Guardian
မြို့တော် News Channel
နိုင်ငံတကာသတင်း
