ယူကရိန်းမြို့တော် ကီးယက်ဗ် ကို ရုရှားက ဒုံးကျည်အပြင် ဒရုန်းတွေနဲ့ တိုက်ခိုက်ခဲ့တာကြောင့် ရိက္ခာဂိုဒေါင်တွေ ပျက်စီးပြီး အရပ်သား ၁၇ ဦး သေဆုံး

ယူကရိန်းမြို့တော် ကီးယက်ဗ် ကို ရုရှားက ဒုံးကျည်အပြင် ဒရုန်းတွေနဲ့ တိုက်ခိုက်ခဲ့တာကြောင့် ရိက္ခာဂိုဒေါင်တွေ ပျက်စီးပြီး အရပ်သား ၁၇ ဦး သေဆုံး

ဩဂုတ် ၆

ရုရှားစစ်တပ်ဟာ ယူကရိန်းမြို့တော် ကီးယက်ဗ်နှင့် အနီးတဝိုက် ဒေသတွေကို ဒုံးကျည်တွေအပြင် အီရန်လုပ် ကာမီကာဇေ ဒရုန်း အမြောက်အမြားနဲ့ လေကြောင်းမှ ပစ်ခတ်တိုက်ခိုက်ခဲ့တာကြောင့် သိုလှောင်ရုံ ၁၃ ရုံ၊ ကုန်ထုတ်လုပ်ရေးစက်ရုံတစ်ရုံ၊ လူနေအိမ် ၄ လုံးနှင့် မော်တော်ယာဉ် ဒါဇင်နှင့်ချီ ပျက်စီးခဲ့ပြီး အနည်းဆုံး အရပ်သားပြည်သူ ၁၇ ဦး သေဆုံးခဲ့ကာ ၂၀ ထက်မနည်း ဒဏ်ရာရရှိခဲ့ပါတယ်။

လေကြောင်း စီးနင်းတိုက်ခိုက်မှုအတွင်း ဒုံးကျည်တွေနှင့် ကာမီကာဇေ ဒရုန်းတွေဟာ ယူကရိန်းမြို့တော် ကီးယက်ဗ်ရဲ့ စက်မှုဇုန်နှင့် ထောက်ပံ့ပို့ဆောင်ရေး စင်တာ ၇ ခုပေါ်သို့ ကျရောက်ခဲ့ရာ ကီးယက်ဗ်မြို့ပြ ဧရိယာအတွင်းရှိ အဓိက စာနပ်ရိက္ခာ သိုလှောင်ရုံ ဂိုဒေါင်ကြီးတွေ တိုက်ရိုက် ထိမှန်ကာ ပြင်းထန်စွာ မီးလောင်ကျွမ်းခဲ့တယ်လို့ သိရပါတယ်။

အဆိုပါ တိုက်ခိုက်မှုကြောင့် လူထုအတွက် အရေးပါတဲ့ စာနပ်ရိက္ခာ ထောက်ပံ့ရေးစနစ် အကြီးအကျယ် ထိခိုက်ခဲ့ရတဲ့အပြင် ဒုံးကျည် အပျက်အစီးတွေကြောင့် အနီးအနားရှိ လျှပ်စစ် ဓာတ်အားပေး စက်ရုံခွဲအချို့နှင့် လူနေအဆောက်အအုံတွေပါ ပျက်စီးခဲ့ပါတယ်။

ယူကရိန်း သမ္မတ ဇယ်လန်းစကီးက အဆိုပါ တိုက်ခိုက်မှုနှင့် ပတ်သက်ပြီး ပြင်းထန်စွာ ပြစ်တင်ရှုတ်ချလိုက်ပြီး ရုရှားဟာ စစ်ပွဲအတွင်း အရပ်သား ပြည်သူတွေရဲ့ အသက်ရှင်သန်ရေးအတွက် အခြေခံကျတဲ့ စာနပ်ရိက္ခာနှင့် ထောက်ပံ့ရေး ဗဟိုချက်တွေကို တမင်သက်သက် ပစ်မှတ်ထား တိုက်ခိုက်နေတာဖြစ်ကြောင်း ပြောဆိုခဲ့ပါတယ်။ ဒါ့အပြင် သူ့ရဲ့ တယ်လီဂရမ်မှတစ်ဆင့် ရုရှားရဲ့ အကြမ်းဖက် တိုက်ခိုက်မှုတွေကို ဟန့်တားနိုင်ဖို့ လက်နက်အကူအညီတွေ ပိုမိုလိုအပ်နေပြီဖြစ်ကြောင်း ပြောဆိုခဲ့ပါတယ်။

သမ္မတ ဇယ်လန်းစကီးက လက်ရှိမှာ ယူကရိန်းရဲ့ လေကြောင်းရန် ကာကွယ်ရေး ဒုံးကျည် အရန်ထားရှိမှုဟာ စိုးရိမ်ဖွယ်ရာ ဆိုးရွားစွာ လျော့နည်းနေပြီ ဖြစ်ကြောင်း ထုတ်ဖော်ပြောဆိုခဲ့ပြီး အမေရိကန်နှင့် ဥရောပ မဟာမိတ် နိုင်ငံတွေအနေနဲ့ လေကြောင်းရန် ကာကွယ်ရေး စနစ်တွေအတွက် လိုအပ်နေတဲ့ ဒုံးကျည်တွေကို အချိန်မဆိုင်းဘဲ အရေးပေါ် ချက်ချင်း ပေးပို့ပေးဖို့ ထပ်မံ တိုက်တွန်းတောင်းဆိုခဲ့ပါတယ်။

စစ်ရေးအကဲခတ်တွေရဲ့ သုံးသပ်ချက်အရ ရုရှားဟာ သာမန် စွမ်းအင် အခြေခံ အဆောက်အအုံတွေကို တိုက်ခိုက်တဲ့ နည်းဗျူဟာအပြင် ယခုအခါ ပြည်သူတွေရဲ့ ရိက္ခာ သိုလှောင်ရုံတွေနှင့် ကုန်စည် စီးဆင်းမှု ဗဟိုချက်တွေကိုပါ ပစ်မှတ်ထားလာတာကြောင့် ယူကရိန်းရဲ့ စီးပွားရေးနှင့် ပြည်သူတို့ရဲ့ စိတ်ဓာတ်ကို စစ်ဆင်ရေးအရ ပိုမိုဖိအားပေးဖို့ ကြိုးပမ်းလာတာဖြစ်တယ်လို့ ထောက်ပြနေကြပါတယ်။

အထူးသဖြင့် အနောက်အုပ်စုရဲ့ စစ်ရေးအကူအညီနှင့် လေကြောင်းရန် ကာကွယ်ရေး လက်နက်တွေ ပံ့ပိုးမှု ကြန့်ကြာနေတဲ့ အချိန်ကို အခွင့်ကောင်းယူပြီး ရုရှားက လာမယ့် ဆောင်းရာသီ မတိုင်မီ လေကြောင်း စီးနင်းတိုက်ခိုက်မှု အရှိန်အဟုန်ကို မြှင့်တင်ကာ အသာစီးရယူဖို့ ကြိုးပမ်းနေတာဖြစ်တယ်ဟု စစ်ရေးအကဲခတ် ကျွမ်းကျင်သူတွေက သုံးသပ်ထားကြပါတယ်။

Photo: Reuters

မြို့တော် News Channel