မြောက်ကိုရီးယားကနေ စစ်သည် ၃၀,၀၀၀ ထပ်မံခေါ်ယူဖို့ ရုရှား ပြင်ဆင်နေ
ဇူလိုင် ၂၇
၄ နှစ်ကျော် ကြာမြင့်နေပြီဖြစ်တဲ့ ယူကရိန်းစစ်ပွဲအတွင်း ရုရှားနိုင်ငံဟာ မြောက်ကိုရီးယား စစ်သည်အင်အား ၃၀,၀၀၀ အထိ ထပ်မံဖြည့်တင်း ခေါ်ယူသွားဖို့ စီစဉ်နေပြီး အဆိုပါတပ်ဖွဲ့တွေကို လက်ခံဖို့လည်း ပြင်ဆင်မှုတွေ စတင်နေပြီဖြစ်တယ်လို့ ယူကရိန်းသမ္မတ ဗိုလိုဒီမီယာ ဇီလန်စကီး ဇူလိုင်လ ၂၅ ရက်နေ့က ပြောဆိုလိုက်ပါတယ်။
ရုရှားနဲ့ မြောက်ကိုရီးယားတို့ ချုပ်ဆိုထားတဲ့ ပူးတွဲကာကွယ်ရေး သဘောတူညီချက်အရ ၂၀၂၄ ခုနှစ်တုန်းကလည်း မြောက်ကိုရီးယား စစ်သည်အင်အား ၁၄,၀၀၀ နီးပါးဟာ ရုရှားနိုင်ငံ ကာ့စ်ခ်ဒေသဆီ စေလွှတ်ခြင်းခံခဲ့ရပြီး ယူကရိန်းတပ်ဖွဲ့တွေရဲ့ အဓိကထိုးစစ်ကို တွန်းလှန်ရာမှာ ပါဝင်ကူညီခဲ့ကြပါသေးတယ်။
“ကျနော်တို့အနေနဲ့ ရုရှားနဲ့ မြောက်ကိုရီးယားတို့ကြား ပူးပေါင်းဆောင်ရွက်မှုကို ဆက်လက်တွေ့မြင်နေရပါတယ်။ ရုရှားဟာ နောက်ထပ် မြောက်ကိုရီးယား စစ်သည် ၃၀,၀၀၀ ကို ခေါ်ယူချင်နေတာဖြစ်ပြီး အဲဒီတပ်ဖွဲ့တွေကို လက်ခံဖို့အတွက် ဇွန်လကတည်းက ရုရှားနိုင်ငံ ဗိုရိုနက်ရှ် ဒေသမှာ ပြင်ဆင်မှုတွေ စတင်ပြုလုပ်နေတာကို တွေ့ရပါတယ်" လို့ ဇီလန်စကီးက ညစဉ်ပြောကြားနေကျ ရုပ်သံမိန့်ခွန်းမှာ ထည့်သွင်းပြောဆိုသွားခဲ့တာ ဖြစ်ပါတယ်။
ဒါ့အပြင် မြောက်ကိုရီးယားဘက်ကလည်း ရုရှားအတွက် ပဲ့ထိန်းဒုံးကျည် လွှတ်တင်စင်အသစ်တွေ ပံ့ပိုးပေးဖို့ ပြင်ဆင်နေတယ်လို့လည်း ဆိုပါတယ်။
“ဒီလုပ်ရပ်ဟာ ယူကရိန်းနိုင်ငံ တစ်ခုတည်းအတွက်တင် ခြိမ်းခြောက်မှု မဟုတ်ပါဘူး။ ရုရှားဟာ မြောက်ကိုရီးယားကို စစ်တိုက်နည်း သင်ပေးနေတာဖြစ်သလို၊ လက်နက်စွမ်းရည် တိုးတက်စေဖို့နဲ့ တကယ့်စစ်မြေပြင် အတွေ့အကြုံတွေ ရရှိအောင် ကူညီပေးနေတာပါ။ ဒါတွေဟာ မြောက်ကိုရီးယား ဒုံးကျည် လက်လှမ်းမီတဲ့ အာရှဒေသတွင်း နိုင်ငံတိုင်းအတွက် ကြီးမားတဲ့ ခြိမ်းခြောက်မှု ဖြစ်လာနေတယ်” လို့ ယူကရိန်းသမ္မတက သတိပေး ပြောဆိုထားပါတယ်။
Ref & Photo; Reuters
မြို့တော် News Channel
နိုင်ငံတကာသတင်း
