ထရမ့်အစိုးရက Huawei ကို ယှဉ်ပြိုင်ဖို့ Africell ကို ဒေါ်လာ သန်း ၁၀၀ နီးပါး ချေးငွေထုတ်ပေးမယ်လို့ဆို

ထရမ့်အစိုးရက Huawei ကို ယှဉ်ပြိုင်ဖို့ Africell ကို ဒေါ်လာ သန်း ၁၀၀ နီးပါး ချေးငွေထုတ်ပေးမယ်လို့ဆို

စက်တင်ဘာ ၁၁

အာဖရိကမှာ တရုတ်ဆက်သွယ်ရေးကုမ္ပဏီ Huawei ရဲ့ တိုးချဲ့လာမှုကို တုံ့ပြန်ဖို့ ဒေါ်နယ်ထရမ့်အစိုးရက အမေရိကန်ပိုင် ဆက်သွယ်ရေးကုမ္ပဏီ Africell ကို ဒေါ်လာ သန်း ၁၀၀ နီးပါး ချေးငွေထုတ်ပေးမယ်လို့ Reuters က ဖော်ပြပါတယ်။

အမေရိကန် ပို့ကုန်-သွင်းကုန်ဘဏ် (EXIM) က ထုတ်ပေးမယ့် ချေးငွေကို Africell က အမေရိကန်နဲ့ မဟာမိတ်နိုင်ငံတွေက ထုတ်လုပ်တဲ့ နောက်ဆုံးပေါ် မိုဘိုင်းကွန်ရက်နည်းပညာတွေမှာ ရင်းနှီးမြှုပ်နှံဖို့ အသုံးပြုမှာ ဖြစ်တယ်လို့ ဆိုပါတယ်။

Africell ရဲ့ အမှုဆောင်အရာရှိချုပ်ကလည်း အမေရိကန်နဲ့ မဟာမိတ်နိုင်ငံတွေက နည်းပညာတွေကို အသုံးပြုပြီး ယုံကြည်စိတ်ချရပြီး လုံခြုံတဲ့ ဆက်သွယ်ရေးအခြေခံအဆောက်အအုံတွေ တည်ဆောက်သွားမယ်လို့ ပြောဆိုထားပါတယ်။

ထရမ့်အစိုးရဟာ ပထမသမ္မတသက်တမ်းကတည်းက တရုတ်ဆက်သွယ်ရေးနည်းပညာတွေကို ကန့်သတ်ဖယ်ရှားဖို့ “Clean Network” အစီအစဉ်ကို လုပ်ဆောင်ခဲ့ပြီး ယခု ဒုတိယသမ္မတသက်တမ်းမှာလည်း အလားတူ မူဝါဒတွေကို ဆက်လက်လုပ်ဆောင်နေပါတယ်။

သုံးစွဲသူတွေရဲ့ အချက်အလက်တွေကို သူလျှိုလုပ်နိုင်တယ်ဆိုတဲ့ စိုးရိမ်ချက်တွေကြောင့် တရုတ်ပိုင် Huawei ကုမ္ပဏီအပေါ် အမေရိကန်အစိုးရက ပြင်းထန်တဲ့ ပိတ်ဆို့အရေးယူမှုတွေလည်း ချမှတ်ထားပါတယ်။ Huawei ဘက်ကတော့ အဲဒီစွပ်စွဲချက်တွေကို ငြင်းဆိုထားပါတယ်။

၂၀၀၁ ခုနှစ်က တည်ထောင်ခဲ့တဲ့ Africell ဟာ လက်ရှိ အန်ဂိုလာ၊ ဂမ်ဘီယာ၊ ကွန်ဂိုဒီမိုကရက်တစ်သမ္မတနိုင်ငံနဲ့ ဆီယာရာလီယွန်နိုင်ငံတွေမှာ သုံးစွဲသူ ၁၅ သန်းခန့်ကို ဝန်ဆောင်မှုပေးနေပါတယ်။

Africell ဟာ ၂၀၁၈ ခုနှစ်ကလည်း အမေရိကန်အစိုးရထံက ဆက်သွယ်ရေးအခြေခံအဆောက်အအုံတွေ တိုးချဲ့ဖို့ ဒေါ်လာ သန်း ၁၀၀ ချေးငွေ ရရှိခဲ့ဖူးပါတယ်။

Counterpoint Research အဆိုအရ Huawei ဟာ အာဖရိကရဲ့ 5G အခြေခံအဆောက်အအုံဈေးကွက်မှာ ၅၂ ရာခိုင်နှုန်းခန့် ရှယ်ယာရရှိထားတယ်လို့ ဆိုပါတယ်။

Ref & Photo; Reuters

မြို့တော် News Channel