ပတ္တရားမှာ အရက်မူး ရန်ဖြစ်ခဲ့တဲ့ အမေရိကန် ရေတပ်သား ၂ ဦး သင်္ဘောပေါ် ပြန်ပို့ခံရ

ပတ္တရားမှာ အရက်မူး ရန်ဖြစ်ခဲ့တဲ့ အမေရိကန် ရေတပ်သား ၂ ဦး သင်္ဘောပေါ် ပြန်ပို့ခံရ

စက်တင်ဘာ ၄

ထိုင်းနိုင်ငံ ပတ္တရားမြို့မှာ ဆိုက်ကပ်ထားတဲ့ အမေရိကန်လေယာဉ်တင်သင်္ဘော USS Abraham Lincoln ပေါ်က ရေတပ်သား ၂ ဦးဟာ အရက်မူးပြီး ခိုက်ရန်ဖြစ်ပွားခဲ့တာကြောင့် သင်္ဘောပေါ်ကို ပြန်ပို့ခံလိုက်ရတယ်လို့ ထိုင်းရဲတပ်ဖွဲ့က ပြောဆိုလိုက်ပါတယ်။

စက်တင်ဘာ ၃ ရက် မနက်အစောပိုင်းက ပတ္တရားမြို့ရဲ့ နာမည်ကျော် ညအပန်းဖြေနေရာ Walking Street အနီးမှာ အဆိုပါရေတပ်သားတွေ အရက်မူးပြီး အော်ဟစ်ရန်ဖြစ်ခဲ့ကြတာလို့ ဆိုပါတယ်။

အခြေအနေ ပိုမိုဆိုးရွားမလာစေဖို့ ဒေသခံတွေက အကြောင်းကြားခဲ့တာကြောင့် ရဲတပ်ဖွဲ့က သွားရောက်ဖြေရှင်းခဲ့ရပြီး ရေတပ်သားတွေကြား ဖြစ်ပွားခဲ့တဲ့ အချင်းများမှုဟာ အသေးစားဖြစ်စဉ်သာ ဖြစ်တယ်လို့ ပတ္တရားမြို့ ရဲတပ်ဖွဲ့မှူး ရဲမှူးကြီး အနက်ခ် စရသွန်ဂယူက ပြောပါတယ်။

ဒါ့အပြင် ထိုင်းဥပဒေကို ချိုးဖောက်ထားခြင်း မရှိတာကြောင့် ရေတပ်သား ၂ ဦးကို တရားစွဲဆိုခြင်း မပြုခဲ့ဘဲ အမေရိကန်လေယာဉ်တင်သင်္ဘောကို ပြန်လည်ပို့ဆောင်ခဲ့တယ်လို့ ဆိုပါတယ်။

USS Abraham Lincoln ဟာ ပင်လယ်ပြင်မှာ ရက်ပေါင်း ၂၈၀ ကျော် တာဝန်ထမ်းဆောင်ပြီးနောက် ပတ္တရားကို ဆိပ်ကမ်းဝင်ရောက်လာတာဖြစ်ပြီး သင်္ဘောပေါ်မှာ အစားအစာပြတ်လပ်မှု၊ ရေပိုက်လိုင်းပျက်စီးမှုနဲ့ စိတ်ကျန်းမာရေးပြဿနာတွေ ရှိနေတယ်ဆိုတဲ့ သတင်းတွေကြောင့် နိုင်ငံတကာမီဒီယာတွေရဲ့ အာရုံစိုက်မှု ရရှိနေပါတယ်။

အဲဒီသတင်းတွေနဲ့ပတ်သက်ပြီး အမေရိကန်လွှတ်တော်အမတ်တွေက စုံစမ်းစစ်ဆေးဖို့ တောင်းဆိုခဲ့ပေမယ့် သမ္မတ ဒေါ်နယ်ထရမ့်ကတော့ စိုးရိမ်မှုတွေကို ပယ်ချထားပါတယ်။

တစ်ဖက်မှာလည်း ခရီးသွားရာသီ မဟုတ်တဲ့အတွက် အမေရိကန် စစ်သည်တွေ ရောက်လာချိန်မှာ ဒေသတွင်း စီးပွားရေး ပြန်ကောင်းလာမယ်လို့ ပတ္တရားမြို့ခံတွေ မျှော်လင့်ခဲ့ကြပေမဲ့ လက်တွေ့မှာတော့ ထင်သလောက် စည်ကားမလာဘဲ ငြိမ်သက်နေဆဲဖြစ်တယ်လို့ ဒေသခံတွေက ပြောပါတယ်။

Ref & Photo; Bangkok Post

မြို့တော် News Channel