မန္တလေးမှာ သံဃာနဲ့ ကိုရင် ၇၆ ပါး အစာအဆိပ်သင့်ပြီး ဆေးရုံတင်ထားရ

မန္တလေးမှာ သံဃာနဲ့ ကိုရင် ၇၆ ပါးခန့် အစာအဆိပ်သင့်လို့ ဆေးရုံတွေမှာ ကုသနေရ

၂၀၂၆ သြဂုတ် ၂၆ Myo Taw

မန္တလေးတိုင်း၊ ပုသိမ်ကြီးမြို့၊ အုန်းချောကျေးရွာရှိ ပေါက်စိမ်းသာမဏေကျော် ဘုန်းကြီးကျောင်းမှာ သံဃာတော်တွေနဲ့ ကိုရင်တွေ အစာအဆိပ်သင့်မှု ဖြစ်ပွားခဲ့တယ်လို့ သိရပါတယ်။

ဩဂုတ်လ ၂၆ ရက် ဒီကနေ့ မနက် ၁၀ နာရီခန့်က သံဃာတော်တွေနဲ့ ကိုရင်တွေ အပါအဝင် ၇၆ ပါးခန့် အစာအဆိပ်သင့်ခဲ့တာကြောင့် အရေးပေါ် ဆေးရုံတင်ထားရတယ်လို့ သိရပါတယ်။

"ကျောင်းထိုင်ဆရာတော်က ဘဒ္ဒန္တ ကေသရ ပါ။ စာသင်ဆရာတော် ရဟန်း ၇ ပါး၊ ကိုရင် ၁၅၈ ပါး၊ ပေါင်း ၁၆၅ ပါး ရှိတယ်။ မနက် ၇ နာရီလောက်က အာရုံဆွမ်း ဘုန်းပေးတယ်။ လက်ဖက်ထမင်း၊ ငါးဖယ်သုတ်၊ ငရုတ်သီးကြော်၊ ရိုးရိုးဟင်းရည်နဲ့ ဘုန်းပေးကြတာ။ အဲ့အထဲက သံဃာနဲ့ ကိုရင် အပါး ၇၀ ကျော်လောက်က အစာအဆိပ်သင့်ကြတယ်" လို့ ဖြစ်စဥ်ကိုသိတဲ့ ဒေသခံတဦးက မြို့တော်ကို ပြောပါတယ်။

အစာအဆိပ်သင့် သံဃာနဲ့ ကိုရင် ၃၀ ပါးဟာ မန္တလေးပြည်သူ့ဆေးရုံကြီးမှာ ဆေးဝါးကုသမှု ခံယူနေရပြီး စိုးရိမ်ရတဲ့ အခြေအနေ မဟုတ်ဘူးလို့ သိရကာ ကျန်တဲ့ သံဃာနဲ့ ကိုရင် ၄၆ ပါးဟာလည်း ကျောက်မီး တိုက်နယ်ဆေးရုံမှာ ဆေးကုသမှု ခံယူနေပြီး စိုးရိမ်ရတဲ့ အခြေအနေမှာ မရှိဘူးလို့ သိရပါတယ်။