ဖိလစ်ပိုင်ပင်လယ်ပြင်မှာ မုန်တိုင်းဖြစ်ပေါ်လာနိုင်ပြီး ရခိုင်နှင့် ချင်းပြည်နယ်တို့မှာ မိုးအလွန်ကြီးနိုင်တယ်လို့ဆို

ဖိလစ်ပိုင်ပင်လယ်ပြင်မှာ မုန်တိုင်းဖြစ်ပေါ်လာနိုင်ပြီး ရခိုင်နှင့် ချင်းပြည်နယ်တို့မှာ မိုးအလွန်ကြီးနိုင်တယ်လို့ဆို

ဇူလိုင် ၂၁

ECMWF, GFS နှင့် ICON မော်ဒယ်တွေရဲ့ မိုးလေဝသ ထုတ်ပြန်ချက်တွေအရ ဖိလစ်ပိုင်နိုင်ငံ လူဇုန်းကျွန်း (Luzon) မြောက်ဘက်/အရှေ့မြောက်ဘက် ပင်လယ်ပြင်မှာ အားကောင်းတဲ့ မုန်တိုင်းတစ်ခု ဖြစ်ပေါ်လာနိုင်တယ်လို့ မိုးလေဝသ ပညာရှင် ဦးဝင်းနိုင်က ခန့်မှန်း သုံးသပ်ထားပါတယ်။

ECMWF နဲ့ ICON မော်ဒယ်တို့ရဲ့ ထုတ်ပြန်ချက်အရ မုန်တိုင်းဟာ အနောက်မြောက်ဘက်သို့ ဦးတည်ရွေ့လျားပြီး တရုတ်နိုင်ငံတောင်ပိုင်းနှင့် ဗီယက်နမ်နိုင်ငံမြောက်ပိုင်း တို့ဆီသို့ ကုန်းတွင်းပိုင်း ဖြတ်ကျော်ဝင်ရောက်မယ့် အနေအထားရှိနေတယ်လို့ ဆိုပါတယ်။

GFS မော်ဒယ်ရဲ့ အဆိုအရ မုန်တိုင်းဗဟိုချက်ဟာ တရုတ်ကမ်းရိုးတန်း အနီးတစ်ဝိုက်မှာ တစ်ခုနှင့် ဖိလစ်ပိုင်အရှေ့ဘက် ပင်လယ်ပြင်မှာ နောက်ထပ်စနစ်တစ်ခုအဖြစ် ခွဲထွက်ကာ ပိုမိုကျယ်ပြန့်တဲ့ လေဝဲစနစ်ကြီးအဖြစ် ရွေ့လျားနေတယ်လို့ ဆိုပါတယ်။

ဇူလိုင်လ ၂၄ ရက်နဲ့ ၂၅ ရက်မှာတော့ ဘင်္ဂလားပင်လယ်အော်မှာ သာမန် မုတ်သုံလေစီးကြောင်းသာ ရှိပေမယ့် ICON မော်ဒယ်ရဲ့ ခန့်မှန်းချက်အရ ဇူလိုင်လ ၂၇ ရက်မှာ ဘင်္ဂလားပင်လယ်အော် မြောက်ပိုင်း (ဘင်္ဂလားဒေ့ရှ်/ရခိုင်ကမ်းလွန်)မှာ လေဖိအား နည်းရပ်ဝန်း/လေပွေလှိုင်းအသစ်တစ်ခု ထပ်မံစတင်ဖွဲ့စည်းလာနိုင်တယ်လို့ ဆိုပါတယ်။

ဇူလိုင်လ ၂၇ ရက်ဝန်းကျင်မှာ ဘင်္ဂလားပင်လယ်အော်မြောက်ပိုင်းမှ လေပွေလှိုင်းအသစ်နှင့် မုတ်သုံလေပြင်း ပေါင်းစပ်မှုကြောင့် ရခိုင်ပြည်နယ် (စစ်တွေ၊ ကျောက်ဖြူ၊ သံတွဲ)နှင့် ချင်းပြည်နယ် တို့မှာ ၃ ရက်အတွင်း မိုးရေချိန် ၂၀၀ မီလီမီတာ မှ ၃၀၀ မီလီမီတာအထိ ရရှိနိုင်ပြီး မိုးအလွန်ကြီး နိုင်တယ်လို့ ဆိုပါတယ်။

ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ မွန်ပြည်နယ်၊ ကရင်ပြည်နယ်၊ တနင်္သာရီတိုင်း တို့မှာ မုတ်သုံလေပြင်း အဝင်လမ်းကြောင်းအတွင်း ကျရောက်နေတာကြောင့် နေရာစိပ်စိပ် မိုးရွာသွန်းနိုင်ပြီး ကမ်းရိုးတန်းနှင့် မုတ္တမကွေ့အနီးမှာ မိုးသက်လေပြင်းကျတာ၊ နေရာကွက်ပြီး မိုးကြီးတာတွေ ဖြစ်ပေါ်နိုင်တယ်လို့ ဆိုပါတယ်။ ၃ ရက်တာအတွင်း မိုးရေချိန် ၁၀၀ မီလီမီတာမှ ၂၀၀ မီလီမီတာအထိ ရရှိနိုင်တယ်လို့ ဆိုပါတယ်။

စစ်ကိုင်းတိုင်း၊ ကချင်ပြည်နယ်၊ ရှမ်းပြည်နယ်တို့မှာ မုတ်သုံမြောင်တန်းနှင့် မုန်တိုင်း အရှိန်အဟုန် အနောက်ဘက်သို့ ရွေ့လျားမှုတို့ကြောင့် ကုန်းတွင်းပိုင်း တောင်တန်းဒေသတွေမှာ မိုးကျယ်ကျယ်ပြန့်ပြန့် ရွာသွန်းမယ်လို့ ဆိုပါတယ်။

နေပြည်တော်၊ မကွေးတိုင်းနှင့် မန္တလေးတိုင်းတို့မှာ မိုးအသင့်အတင့် ရွာသွန်းနိုင်ပြီး မွန်းလွဲပိုင်း၊ ညနေပိုင်း၊ ညပိုင်းအချိန်တွေအတွင်း မိုးတိမ်တောင်တွေကြောင့် မိုးထစ်ခြုန်း ရွာတာမျိုး ဖြစ်ပေါ်နိုင်လာတယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်။

မြို့တော် News Channel

#myotawnpt

#Myotaw