နေပြည်တော်မှာ နေအိမ်ပေါ်အထိတက်ကာ လူငယ်တွေ ဖမ်းဆီးခံနေရ

နေပြည်တော်မှာ နေအိမ်ပေါ်အထိတက်ကာ လူငယ်တွေ ဖမ်းဆီးခံနေရ

ဇူလိုင် ၂၉

နေပြည်​တော်၊ လယ်​​ဝေးမြို့နယ်၊ အ​ရှေ့ကြို့ပင်​ကျေးရွာ အုပ်ချူပ်​ရေးမှူး ဦး​ကျော်​ဌေး က အိမ်​ထောင်စုတွေဆီက စစ်မှုထမ်းကြေး လစဉ်ကောက်ခံခဲ့ပေမယ့် လူငယ်တွေကိုလည်း နေအိမ်ပေါ်အထိ တက်ကာ ဖမ်းဆီးတာတွေ လုပ်ဆောင်နေတယ်လို့ ဒေသခံတွေရဲ့ သတင်းပေးပို့မှုအရ သိရပါတယ်။

ဇူလိုင်လ ၂၁ ရက်နေ့က အ​ရှေ့ကြို့ပင်​ကျေးရွာနေ အဘ ဦးသောင်းရွှေရဲ့ သားဖြစ်သူ မောင်ငြိမ်းချမ်းကို ဟာ နေအိမ်ထဲမှာ ထိုင်နေစဉ် အုပ်ချူပ်​ရေးမှူး ဦး​ကျော်​ဌေး နှင့် အပေါင်းအပါတွေက စစ်မှုထမ်းအတွက်လို့ဆိုကာ ဖမ်းဆီးခေါ်ဆောင်သွားတာ ခံခဲ့ရပြီး လက်ရှိအချိန်ထိ မိသားစုနဲ့ အဆက်အသွယ် မရသေးဘူးလို့ ဆိုပါတယ်။

အ​ရှေ့ကြို့ပင်​ကျေးရွာ အုပ်ချူပ်​ရေးမှူး ဦး​ကျော်​ဌေး ဟာ စစ်မှုထမ်းကြေးအဖြစ် အိမ်ထောင်စု တစုကို လစဥ် ၇ ​သောင်းကျပ် ​ကောက်ခံထားသလို လူငယ်တွေကိုလည်း ဖမ်းဆီးမှုတွေ လုပ်ဆောင်နေတာကြောင့် စစ်မှုထမ်း လူရောင်းစားတာတွေ လုပ်ဆောင်နေတာ ဖြစ်နိုင်တယ်လို့ ပြောဆိုမှုတွေလည်း ထွက်ပေါ်နေပါတယ်။

ဇွန်လ ၂၉ ရက် ည ၁၁ နာရီခွဲခန့်ကလည်း ပျဉ်းမနားမြို့နယ်၊ ဆင်သေကျေးရွာ၊ ဘုန်းကြီးကျောင်း မြောက်ဘက်မှာ နေထိုင်တဲ့ ဦးကျော်လွင်ရဲ့ သားဖြစ်သူ မောင်ဖိုးချစ်ကို အုပ်ချုပ်ရေးမှူး စိုးသက်အောင်နဲ့ အဖွဲ့က အာဏာသိမ်းစစ်တပ် လက်အောက်ခံ ရဲတပ်ဖွဲ့ဝင်တွေကို ခေါ်ဆောင်လာပြီး နေအိမ်ပေါ်အထိ တက်ကာ သေနတ်နဲ့ ချိန်ရွယ် ဖမ်းဆီးခေါ်ဆောင်သွားခဲ့တယ်လို့ သိရပါတယ်။

ပြီးခဲ့တဲ့ မေလ ၁၁ ရက် မနက် ၄ နာရီခန့်ကလည်း ပုဗ္ဗသီရိမြို့နယ်၊ တပင်ရွှေထီး ရပ်ကွက်မှာ အိမ်ငှားနေထိုင်တဲ့ အသက် ၃၀ အရွယ် မောင်ဇင်ကိုနိုင် ကို အာဏာသိမ်းစစ်တပ် လက်အောက်ခံ တပ်ဖွဲ့ဝင်တွေက နေအိမ်ထဲအထိ အတင်းအဓမ္မ လာရောက် ဖမ်းဆီးခေါ်ဆောင်သွားခဲ့ပြီး ရွာတော် စစ်ကြောရေးစခန်းကို ပို့လိုက်တဲ့ ဖြစ်စဉ်ဖြစ်ပွားခဲ့ပါသေးတယ်။

မြို့တော် News Channel