ရန်ကုန်နဲ့ မန္တလေးမှာ ညဘက် လမ်းသွားလမ်းလာတွေကို ပေါ်တာဆွဲဖမ်းဆီးမှု ဆက်တိုက်ဖြစ်နေ

ရန်ကုန်နဲ့ မန္တလေးမှာ ညဘက် လမ်းသွားလမ်းလာတွေကို ပေါ်တာဆွဲဖမ်းဆီးမှု ဆက်တိုက်ဖြစ်နေ

အောက်တိုဘာ ၂၉

ရန်ကုန်နဲ့ မန္တလေးမြို့ကြီးတွေမှာ လမ်းသွားလမ်းလာ အရပ်သားတွေနဲ့ လူငယ်တွေကို အာဏာသိမ်းစစ်တပ်နဲ့ ရဲက မတရားပေါ်တာဆွဲ ဖမ်းဆီးခေါ်ဆောင်တာတွေ ဆက်တိုက်လုပ်နေတယ်လို့ မြေပြင်ကင်းထောက်သတင်းရင်းမြစ်တွေဆီကနေ သိရပါတယ်။

အောက်တိုဘာလ ၂၇ ရက် ည ၈ နာရီခန့်က ရန်ကုန်၊ ဗဟန်းမြို့နယ်၊ ရွှေဂုံတိုင်လမ်းပေါ် အုတ်လမ်းမှတ်တိုင်အနီး မုန့်တီဆိုင်နားမှာ ဆိုင်ကယ် ၅ စီးနဲ့ စောင့်နေတဲ့ အာဏာသိမ်းစစ်တပ်လက်အောက်ခံ ရဲတွေက လမ်းလျှောက်လာတဲ့ လူ ၆ ဦးထဲက အသက် ၄၀ အရွယ် အမျိုးသားတဦးနဲ့ လူငယ်တဦးကို ဝိုင်းဆွဲဖမ်းပြီး ဆိုင်ကယ်ပေါ်တင်ကာ ယုဇနဟိုတယ်ဘက်ကို မောင်းထွက်သွားတယ်လို့ သိရပါတယ်။

ဒါ့အပြင် အောက်တိုဘာလ ၂၆ ရက် ည ၇ နာရီခန့်ကလည်း ရန်ကုန်မြို့ထဲမှာ အလုပ်ကနေ ပြန်လာတဲ့ ဆောက်လုပ်ရေးလုပ်သား လူငယ် ၂ ဦးကို စစ်ကားတစီးနဲ့ စစ်သားတွေက ကားပေါ် အတင်းဆွဲတင် ဖမ်းသွားခဲ့တယ်လို့ သိရပါတယ်။

ဖမ်းဆီးခံရတဲ့ ဆောက်လုပ်ရေးလုပ်သား ၂ ဦးဟာ ကိုသက်ကို အသက် ၃၀ နှစ်ခန့်နဲ့ ကိုနေမင်းထက် အသက်၂၀ နှစ်ခန့် ဆိုသူတို့ဖြစ်ပြီး ဧရာဝတီတိုင်း ငပုတောနဲ့ လပွတ္တာဘက်ကနေ သင်္ဃန်းကျွန်းမြို့နယ်ထဲ အဆောင်ငှားနေရင်း အလုပ်လုပ်နေကြသူတွေဖြစ်ကာ မှော်ဘီမြို့နယ်ထဲက တပ်စခန်းတခုကို စစ်မှုထမ်းစုဆောင်းရေးအတွက် ပို့ခံထားရတယ်လို့ သိရပါတယ်။

အောက်တိုဘာလ ၂၃ ရက်နေ့ကလည်း မင်္ဂလာတောင်ညွန့်မြို့နယ်၊ လမ်း ၅ ခွဆုံ၊ သိမ်ဖြူအထက်လမ်းပေါ်က လူအိုရုံနားမှာ လမ်းလျှောက်နေတဲ့ အသက် ၄၅ နှစ်ကျော်အရွယ် အမျိုးသားတဦးကို အိမ်စီးကားတစီးနဲ့ ရောက်လာတဲ့ လူ ၄ ဦးက ကားပေါ် အတင်းဆွဲတင်ဖို့ လုပ်ခဲ့ပေမဲ့ အပြင်းအထန် ရုန်းကန်ပြီး ထွက်ပြေးခဲ့တာကြောင့် လွှတ်မြောက်ခဲ့ရတယ်လို့ သိရပါတယ်။

အလားတူ မန္တလေးမြို့မှာလည်း အောက်တိုဘာလ ၂၇ ရက် ည ၉ နာရီခွဲခန့်က ကမ်းနားလမ်း၊ ၉၂ လမ်းနဲ့ ၂၆ လမ်းထောင့် Royal Family KTV နားမှာ အာဏာသိမ်းစစ်တပ်က အိမ်စီးကား ၂ စီးနဲ့ လမ်းသွားလမ်းလာ ဆိုင်ကယ်စီး လူငယ်တွေကို လိုက်လံဖမ်းဆီးပြီး ပေါ်တာဆွဲတာတွေ ပြုလုပ်ခဲ့တယ်လို့ သိရပါတယ်။

လက်ရှိမှာ အာဏာသိမ်းစစ်တပ်ဟာ စစ်မှုထမ်းအတွက် လူအင်အားလိုအပ်နေတာကြောင့် ရန်ကုန်နဲ့ မန္တလေးလို မြို့ကြီးတွေမှာ ညဘက် လမ်းသွားလမ်းလာ လူငယ်တွေနဲ့ အမျိုးသားတွေကို ပစ်မှတ်ထားပြီး အလစ်အငိုက် အတင်းအဓမ္မ ဖမ်းဆီးတာတွေ ပိုလုပ်လာနေတယ်လို့ မြေပြင်ကင်းထောက် သတင်းရင်းမြစ်တွေက ပြောပါတယ်။

မြို့တော် News Channel