နေပြည်တော်မှာ ရေကြီးရေလျှံမှုတွေ ဖြစ်ပေါ်ခဲ့ပြီး ဆေးရုံက လူနာတချို့ပါ ရွှေ့ပြောင်းပေးခဲ့ရ

နေပြည်တော်မှာ ရေကြီးရေလျှံမှုတွေ ဖြစ်ပေါ်ခဲ့ပြီး ဆေးရုံက လူနာတချို့ပါ ရွှေ့ပြောင်းပေးခဲ့ရ

ဩဂုတ် ၁

မိုးသည်းထန်စွာ ရွာသွန်းမှုကြောင့် နေပြည်တော်အတွင်းမှာ ရေကြီးရေလျှံမှုတွေ ဖြစ်ပေါ်ခဲ့ပြီး ပုဗ္ဗသီရိမြို့နယ်ရှိ လူနေအိမ်တွေနှင့် ဥတ္တရသီရိမြို့နယ်ရှိ ဆေးရုံတွေမှာ ဇူလိုင် ၃၁ ရက်နေ့ မနေ့က ညပိုင်းမှာ ရေဝင်ရောက်မှုတွေ ဖြစ်ပေါ်ခဲ့တာကြောင့် ပြောင်းရွှေ့မှုတွေ လုပ်ခဲ့ရတယ်လို့ သိရပါတယ်။

ပုဗ္ဗသီရိမြို့နယ် ဂွေ့ကြီးချောင်း ရေလျှံမှုကြောင့် ဆင်ဖြူရှင်ရပ်ကွက်ရှိ စွယ်တော်လမ်း၊ ရန်ကုန် (၁) လမ်း၊ ရန်ကုန် (၂) လမ်းနှင့် ရန်ကုန် (၃) လမ်းတို့မှာ ရေဝင်ရောက်ခဲ့တာကြောင့် ဒေသခံတွေကို ကား၊ အိုးဝေ တို့နဲ့ ဘေးလွတ်ရာသို့ ရွှေ့ပြောင်းပေးခဲ့ရတယ်လို့ သိရပါတယ်။

ဥတ္တရသီမြို့နယ်မှာရှိတဲ့ ဖိုးဆောင်းတောင်မှ တောင်ကျရေ ဝင်ရောက်မှုကြောင့် အရိုးရောဂါ အထူးကု ဆေးရုံရဲ့ သွေးလှူဆောင်၊ ဓာတ်မှန်ဆောင်နှင့် ဆေးရုံဝန်းအတွင်းမှာ ရေဝင်ရောက်ခဲ့ပြီး လူနာတချို့ပါ ပြောင်းရွှေ့ခဲ့ရတယ်လို့ သိရပါတယ်။

"မနေ့ည ၉ နာရီလောက်က စဖြစ်တာ။ ဥတ္တရသီရိ ခုတင် ၅၀၀ အရိုးဆေးရုံကြီးမှာတော့ ဆုံးရှုံးပျက်စီးမှု တော်တော်များသွားတယ်။ သွေးလှူဘဏ်က သွေးအိတ်တွေလည်း ရွှေ့ရတယ်။ လူနာ ၄ ယောက် ကိုတော့ ပြည်သူ့ဆေးရုံကြီး ခုတင် ၁၀၀၀ ကို ရွှေ့ပေးလိုက်ရတယ်။ လက်ရှိမှာတော့ ရေတွေက ပြန်ကျနေပြီ။ အဆောက်အဦ တွေထဲထိ ရေဝင်တော့ ကြမ်းခင်းတွေမှာ ရွှံတွေချည်းပဲ ကျန်ခဲ့တယ်" လို့ လူမှုကရုဏာရှင် အသင်းမှ တာဝန်ရှိသူတဦးက မြို့တော်ကို ပြောပါတယ်။

ပုဗ္ဗသီရိမြို့နယ်ရှိ လူနေအိမ်တွေနှင့် ဥတ္တရသီရိမြို့နယ်ရှိ အရိုးဆေးရုံကြီး ရေလျှံ ရေဝင်ရောက်မှုတွေကို အရပ်ဘက် လူမှုကူညီရေးအသင်းတွေဖြစ်တဲ့ လူမှုကရုဏာရှင် အသင်း၊ ပျဉ်းမနား အရန်မီးသတ်မှ ကိုဟိန်းအဖွဲ့၊ သက္ကမေတ္တာရှင် ပရဟိတအသင်း၊ ပုဗ္ဗသီရိမြို့နယ် မီးသတ်စခန်း၊ တပင်ရွှေထီးနယ်မြေ မီးသတ်စခန်း၊ ဥတ္တရခရိုင် မီးသတ်စခန်းတို့မှ တပ်ဖွဲ့ဝင်တွေက ကူညီရွှေ့ပြောင်းပေးခဲ့ကြရတယ်လို့ သိရပါတယ်။

မြို့တော် News Channel