၆ ရက်ကြာ ပျောက်ဆုံးနေတဲ့ ရုရှားမော်ဒယ်ကို ခရီးဆောင်အိတ်ထဲ ထည့်ကာ ရေမြောင်းထဲ စွန့်ပစ်ထားတဲ့ ရုပ်အလောင်းအဖြစ် ပြန်တွေ့

၆ ရက်ကြာ ပျောက်ဆုံးနေတဲ့ ရုရှားမော်ဒယ်ကို ခရီးဆောင်အိတ်ထဲ ထည့်ကာ ရေမြောင်းထဲ စွန့်ပစ်ထားတဲ့ ရုပ်အလောင်းအဖြစ် ပြန်တွေ့

ဩဂုတ် ၁

ဆားဘီးယားနိုင်ငံ ဘဲလ်ဂရိတ်မြို့ကို အပန်းဖြေခရီးအဖြစ် ရောက်ရှိလာပြီးနောက် ၆ ရက်ကြာ ပျောက်ဆုံးနေတဲ့ Body Art မော်ဒယ်တဦးကို ခရီးဆောင်အိတ်ထဲ ထည့်ထားကာ ရေမြောင်းအတွင်း စွန့်ပစ်ထားတဲ့ ရုပ်အလောင်းအဖြစ် ပြန်လည်တွေ့ရှိခဲ့တယ်လို့ သိရပါတယ်။

အသက် ၂၈ နှစ်အရွယ် ရုရှားနိုင်ငံသူ လျုဒ်မီလာ တာကိုဗာ ဟာ ဘဲလ်ဂရိတ်မြို့ရှိ နိုက်ကလပ်တစ်ခုမှာ သူငယ်ချင်းတွေနဲ့ တွေ့ဆုံပြီးနောက် ၆ ရက်ကြာ ပျောက်ဆုံးနေခဲ့တာ ဖြစ်ပြီး သူမရဲ့ ရုပ်အလောင်းကို ရေမြောင်းအတွင်း စွန့်ပစ်ထားတဲ့ ခရီးဆောင်အိတ်တစ်ခုထဲမှာ တွေ့ရှိခဲ့ရတယ်လို့ ဆိုပါတယ်။

ဒေသခံတွေက ရွှံ့နွံထူထပ်တဲ့ ရေမြောင်းထဲမှာ သံသယဖြစ်စရာ အရာဝတ္ထုကို တွေ့ရှိပြီး ရဲတပ်ဖွဲ့ကို အကြောင်းကြားခဲ့တာကြောင့် ရဲတွေက အနံ့ခံခွေးတွေ အသုံးပြုကာ ရှာဖွေရာကနေ အလောင်းကို ရှာဖွေတွေ့ရှိခဲ့တာ ဖြစ်တယ်လို့ ဆိုပါတယ်။

လက်တလောမှာတော့ တာကိုဗာ သေဆုံးခဲ့ရတဲ့ အကြောင်းရင်းနဲ့ ပတ်သက်ပြီး ရဲတပ်ဖွဲ့က အသေးစိတ် ထုတ်ဖော်ပြောဆိုခြင်း မရှိသေးပါဘူး။

အဆိုပါ လူသတ်မှုနဲ့ ပတ်သက်ပြီး သံသယရှိသူ အသက် ၂၇ နှစ်အရွယ် တူရကီနိုင်ငံသား K.E ဆိုသူကို နိုင်ငံအတွင်းမှ ထွက်ခွာရန် ကြိုးပမ်းနေစဉ် နီကိုလာ တက်စလာ လေဆိပ်မှာ ဆားဘီးယား အာဏာပိုင်တွေက ဖမ်းဆီးထိန်းသိမ်းလိုက်တယ်လို့ သိရပါတယ်။

ဆားဘီးယား အာဏာပိုင်တွေကတော့ အဆိုပါ တူရကီနိုင်ငံသားဟာ တာကိုဗာကို ဇူလိုင် ၂၆ ရက်နေ့ မနက်အစောပိုင်းမှာ ဘောချာဒေသရှိ ငှားရမ်းထားတဲ့ တိုက်ခန်းတစ်ခုအတွင်း သတ်ဖြတ်ခဲ့တာ ဖြစ်နိုင်တယ်လို့ ကနဦး ယူဆထားရပါတယ်။

တာကိုဗာရဲ့ အလောင်းကိုတော့ ဆေးမှုခင်းဆေးပညာဌာနကို ပို့ဆောင်ထားပြီး သေဆုံးရတဲ့ အကြောင်းရင်းကိုတော့ ရင်ခွဲစစ်ဆေးပြီးမှ သိရှိနိုင်မယ်လို့ ဒေသတွင်းသတင်းမှာ ဖော်ပြထားပါတယ်။

တာကိုဗာဟာ ဘဲလ်ဂရိတ်မြို့ကို နှစ်ပတ်ကြာ အပန်းဖြေခရီးအဖြစ် လာရောက်ခဲ့ခြင်းဖြစ်ပြီး ဇူလိုင် ၂၅ ရက်နေ့က သူငယ်ချင်းတွေနဲ့ တွေ့ဖို့သွားမယ်လို့ မိသားစုဝင်တွေကို ပြောဆိုခဲ့ပြီးနောက် ပျောက်ဆုံးသွားခဲ့တာ ဖြစ်ပါတယ်။

Ref & Photo; The Sun

မြို့တော် News Channel