မုန်တိုင်းအကြွင်းအကျန်ကြောင့် နေပြည်တော်နှင့် အလယ်ပိုင်းဒေသတွေမှာ မိုးကြီးနိုင်တယ်လို့ဆို

မုန်တိုင်းအကြွင်းအကျန်ကြောင့် နေပြည်တော်နှင့် အလယ်ပိုင်းဒေသတွေမှာ မိုးကြီးနိုင်တယ်လို့ဆို

စက်တင်ဘာ ၆

ECMWF, GFS, ICON မော်ဒယ်ကြီး ၃ ခုရဲ့ ထုတ်ပြန်ချက်တွေအရ တောင်တရုတ်ပင်လယ်နှင့် ဖိလစ်ပိုင်နိုင်ငံ အရှေ့ဘက်မှာ လေဖိအားနည်းစနစ် စတင်အားကောင်းလာပြီး ဗီယက်နမ်ကမ်းခြေသို့ စက်တင်ဘာလ ၁၃ ရက်မှ ၁၅ ရက်အတွင်း အနောက်ဘက် ဦးတည်ရွေ့မယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်။

စက်တင်ဘာလ ၁၆ နဲ့ ၁၇ ရက်အတွင်း အဆိုပါစနစ်ဟာ ဗီယက်နမ်နှင့် လာအိုနိုင်ငံတို့ကို ဖြတ်ကျော်ပြီး မုန်တိုင်းအကြွင်းအကျန်နှင့် မိုးတိမ်တိုက်ကြီးတွေအဖြစ် အားလျော့သွားနိုင်တယ်လို့ ဆိုပါတယ်။

စက်တင်ဘာလ ၁၈ မှ ၂၀ ရက်အတွင်း မုန်တိုင်းအကြွင်းအကျန် လေပွေလှိုင်းတွေနှင့် စိုစွတ်တဲ့ မုတ်သုံလေပူတို့ ရောနှောကာ ရှမ်းပြည်နယ် (အရှေ့ပိုင်း၊ တောင်ပိုင်း၊ မြောက်ပိုင်း)၊ စစ်ကိုင်းတိုင်း၊ မန္တလေးတိုင်း၊ မကွေးတိုင်းနှင့် နေပြည်တော် တို့အထိ စိမ့်ဝင်ဖြတ်ကျော်နိုင်ခြေ ရှိတယ်လို့ ဆိုပါတယ်။

ရှမ်းပြည်နယ် (အရှေ့ပိုင်းနှင့် တောင်ပိုင်း) ကျိုင်းတုံ၊ တာချီလိတ်၊ တောင်ကြီး၊ ကလော၊ ညောင်ရွှေ (အင်းလေး)၊ ရမည်းသင်း၊ ပျော်ဘွယ် အနီးတဝိုက်တို့မှာ မိုးကြီးနိုင်တယ်လို့ ဆိုပါတယ်။

နေပြည်တော်၊ မန္တလေး၊ ပြင်ဦးလွင်၊ စစ်ကိုင်း၊ မကွေးတိုင်း အရှေ့ဘက်ခြမ်းနှင့် ရေဆင်း/ပေါင်းလောင်း မြစ်ဝှမ်းဒေသတွေမှာ နေရာကွက်ကျား မိုးကြီးတာနှင့် မိုးဆက်တိုက် ရွာသွန်းနိုင်ပြီး အချို့နေရာတွေမှာ ၂၄ နာရီအတွင်း မိုးရေချိန် မြင့်မားစွာ ရရှိနိုင်တယ်လို့ ဆိုပါတယ်။

ရှမ်းတောင်နှင့် ရှမ်းမြောက် တောင်ကုန်းတောင်တန်း ဒေသတွေမှာ မိုးဆက်တိုက် ရွာသွန်းပါက တောင်ကျရေ ရုတ်တရက် ကျဆင်းလာနိုင်ပြီး ရှမ်းပြည်နယ်မှ စီးဆင်းလာတဲ့ ဒုဋ္ဌဝတီမြစ်၊ စစ်တောင်းမြစ်ဝှမ်း၊ ရမည်းသင်း၊ ပျော်ဘွယ်၊ နေပြည်တော် တဝိုက်ရှိ ချောင်းတွေနှင့် ဆက်စပ်ရေလှောင်တမံတွေမှာ ရေဝင်ရောက်မှု လျင်မြန်စွာ မြင့်တက်လာနိုင်တယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်

မြို့တော် News Channel