DEMU အမြန်ရထားပေါ်မှာ ခရီးသွားတွေကို စိတ်အနှောက်အယှက်ဖြစ်စေခဲ့တဲ့ ဒေါ်မြသန်းနဲ့အဖွဲ့ကို မော်လမြိုင်ရဲစခန်းမှာ အမှုဖွင့်လိုက်တယ်လို့ဆို

DEMU အမြန်ရထားပေါ်မှာ ခရီးသွားတွေကို စိတ်အနှောက်အယှက်ဖြစ်စေခဲ့တဲ့ ဒေါ်မြသန်းနဲ့အဖွဲ့ကို မော်လမြိုင်ရဲစခန်းမှာ အမှုဖွင့်လိုက်တယ်လို့ဆို

ဇူလိုင် ၂၇

မော်လမြိုင်-ရန်ကုန် အမှတ်(၈၄) အစုန် DEMU ရထားပေါ်မှာ အော်ဟစ်ပျော်ပါးခဲ့တဲ့ ဒေါ်မြသန်း ဦးစီးတဲ့ ကမ်းနားလမ်း အားကစားအဖွဲ့က ၅၄ ဦးစလုံးကို ဝေဖန်ပြောဆိုမှုတွေ များလာတာကြောင့် အမှုဖွင့် အရေးယူထားတယ်လို့ သိရပါတယ်။

ဇူလိုင်လ ၂၆ ရက် မနေ့က မော်လမြိုင်ရဲစခန်းမှာ အမှုဖွင့်အရေးယူလိုက်တာ ဖြစ်တယ်လို့ သိရပြီး ပြီးခဲ့တဲ့ ဇူလိုင်လ ၂၃ ရက်နေ့က မော်လမြိုင်-ရန်ကုန် အမှတ်(၈၄)အစုန် DEMU ရထားရဲ့ ပထမတန်း အတွဲ(၃)က ခုံ ၆၀ အတွက် လက်မှတ်ဝယ်ယူခဲ့ကာ ဒေါ်မြသန်းဦးစီတဲ့ ကမ်းနားလမ်းအဖွဲ့က လိုက်ပါစီးနင်းခဲ့ကြပြီး ရထားတစ်တွဲလုံး ဆူညံစွာအော်ဟစ်ခဲ့ကြတယ်လို့ သိရပါတယ်။

“ရထားတစ်စီးလုံး ငှားတာဆို တမျိုးပေါ့၊ အခုက တတွဲလောက်အပြတ် လက်မှတ်ဖြတ်ပြီး ရထားတစီးလုံးက ခရီးသည်တွေ နားမခံသာအောင် ဆူညံနေကြတာ၊ အသက်တွေကြည့်တော့ ဘိုးဘွားရိပ်သာ သွားရမယ့်အရွယ်တွေ၊ အဲ့ထဲမှာ အရာရှိကတော်တွေလည်းပါတယ်၊ အခုလိုအရေးယူပေးမှ တခြားသူတွေလည်း နောက်နောင်ဆင်ခြင်ကြမှာ” လို့ ခရီးသွားပြည်သူတဦးက မြို့တော်ကို ပြောပါတယ်။

အမှတ်(၈၄)အစုန် DEMU ရထားပေါ်မှာ ဆူညံစွာ အော်ဟစ်သီချင်းဆိုခြင်း၊ ရထားထိုင်ခုံ လက်တန်းပေါ်တွေမှာထိုင်ခြင်း၊ ရထားကြမ်းခင်းလျှောက်လမ်းမှာ ပိတ်ဆို့ပြီး ထမင်းဝိုင်းဖွဲ့စားသောက်ခြင်း၊ TikTok ရိုက်ကူးခြင်းအပြင် ဆူညံစွာ ကခုန်ကြတာတွေကြောင့် ရထားစီးခရီးသည်တွေ စိတ်အနှောက်အယှက် ဖြစ်ခဲ့ကြရတယ်လို့ ဆိုပါတယ်။

အဆိုပါဖြစ်စဉ်ကြောင့် လူမှုကွန်ရက်ပေါ်မှာ ဝေဖန်မှုတွေ မြင့်တက်လာခဲ့ပြီး ဖမ်းဆီးပေးဖို့ တောင်းဆိုကြတာကြောင့် ဇူလိုင်လ ၂၆ ရက်နေ့မှာ မြန်မာ့မီးရထား၊ တိုင်းအမှတ်(၈) မော်လမြိုင်မှ အထူးတန်းရုံပိုင်ကြီး ဦးသန်းစိုးကနေ တရားလိုပြုလုပ် တိုင်ကြားခဲ့ကာ ဒေါ်မြသန်း အပါအဝင် ၅၄ ဦးစလုံးကို မော်လမြိုင် မြို့မရဲစခန်းက ရထားပို့ဆောင်ရေး ဥပဒေပုဒ်မ ၈၈(က) အရ အမှုဖွင့် အရေးယူဆောင်ရွက် ထားတယ်လို့ သိရပါတယ်။

လတ်တလောမှာ ဒေါ်မြသန်းနဲ့ အဖွဲ့ကို ခေါ်ယူစစ်ဆေး မေးမြန်းတာတွေ ပြုလုပ်ခဲ့ပြီး ဖမ်းဆီးထားတာမျိုးတော့ မရှိသေးဘူးလို့ သိရပါတယ်။

ပြီးခဲ့တဲ့ ဇူလိုင်လ ၂၀ ရက်နေ့ကလည်း ရန်ကုန်-မန္တလေး DEMU အမြန်ရထားပေါ်မှာ ခရီးသည်တွေကို အနှောင့်အယှက်ဖြစ်အောင်လုပ်ပြီး အရက်သေစာ သောက်စားမူးယစ်နေတဲ့ အမျိုးသား ၃ ဦးနဲ့ ရထားပေါ်မှာ ကွမ်းယာစားပြီး ထုံးနဲ့ ကွမ်းတံတွေးတွေပေကျံကာ ပတ်ဝန်းကျင်ကို ညစ်ပတ်အောင်ပြုလုပ်ခဲ့တဲ့ အမျိုးသမီး ၄ ဦးကိုလည်း (ပ)၁၆၇/၂၀၂၆၊ ရထားပို့ဆောင်ရေး ဥပဒေပုဒ်မ ၈၈(က) နဲ့ ထောင်ဒဏ် ၂ လစီ ချခဲ့တယ်လို့ သိရပါတယ်။