ဥပုသ်ယူပြီးပြန်လာတဲ့ အငြိမ်းစားဆရာမကြီးကို အိမ်ထဲဝင်ခိုးနေတဲ့ သူခိုးက သတ်ဖြတ်သွား

ဧရာဝတီတိုင်း၊ ဟင်္သာတမြို့နယ်၊ နဲမနိတ်ကျေးရွာမှာ ဥပုသ်ယူပြီး ပြန်လာတဲ့ အငြိမ်းစား ကျောင်းဆရာမ ၁ ဦးကို နေအိမ်မှာဝင်ခိုးနေတဲ့ သူခိုးက သတ်ဖြတ်ခဲ့တဲ့ဖြစ်စဉ် ဖြစ်ပွားခဲ့တယ်လို့ သိရပါတယ်။

ဩဂုတ်လ ၂၁ ရက်နေ့ နေ့လယ်ပိုင်းက အငြိမ်းစားဆရာမကြီး ဒေါ်လှလှဝင်းဟာ ဘုန်းကြီးကျောင်းမှာ ဥပုသ်သီလယူပြီး နေအိမ်ကိုပြန်လာချိန် နေအိမ်အတွင်း ဝင်ရောက်ခိုးနေတဲ့ သူခိုးက ရေချိုးခန်းအတွင်းမှာ သရေမျှော့ကြိုးနဲ့ လည်ပင်းကိုပတ်ကာ သတ်ဖြတ်သွားခဲ့တာလို့ ဆိုပါတယ်။

"အငြိမ်စားဆရာမကြီးက မနက်ပိုင်း ဘုန်းကြီးကျောင်းမှာ ဥပုသ်ယူပြီး အိမ်ပြန်သွားတာ။ အိမ်ရောက်တော့ သူ့အိမ်ကိုဝင်ခိုးတဲ့ သူခိုးနဲ့တိုးပြီး အသတ်ခံလိုက်ရတာ၊ နေ့ခင်းပိုင်းလောက်မှ သိရတာ၊ ဘီဒိုတွေလည်း မွှေနှောက်ခံထားရတယ်၊ တရားခံ မမိဘူး၊ ဖြစ်သွားတာ ခဏလေးရယ်" လို့ ဒေသခံတဦးက ပြောပါတယ်။

သတ်ဖြတ်ခံရသူဟာ တဦးတည်းနေထိုင်တဲ့ အသက် ၇၂ နှစ်အရွယ် အငြိမ်းစား ကျောင်းအုပ်ဆရာမကြီး ဒေါ်လှလှဝင်း ဖြစ်ပြီး ဆရာမကြီးဟာ လည်ပင်းကို သရေကြိုးနဲ့ နောက်ပြန်ချည်နှောင်ထားကာ ဝမ်းလျားမှောက်အနေအထားနဲ့ သေဆုံးနေခဲ့တာလို့ သိရပါတယ်။

သေဆုံးသူ ဆရာမကြီးဟာ အိုင်သပြုကျောင်းမှာ တာဝန်ထမ်းဆောင်ခဲ့သလို ၂၀၀၂-၂၀၀၃ ခုနှစ်တွေက အ.ထ.က သောင်ကြီးမှာ ကျောင်းအုပ်ဆရာမကြီးအဖြစ် တာဝန်ကျခဲ့သူဖြစ်ကာ ဟင်္သာတမြို့နယ် ကြက်တူရွေးရွာဇာတိ ဖြစ်တယ်လို့ သိရပါတယ်။

လက်တလောမှာတော့ သေဆုံးသူ ဆရာမကြီးရဲ့ ရုပ်အလောင်းကို ဟင်္သာတဆေးရုံ ရင်ခွဲရုံကို ပို့ဆောင်စစ်ဆေးနေပြီး လူသတ်မှုကျူးလွန်ခဲ့တဲ့ တရားခံကိုတော့ ဖမ်းဆီးရမိခြင်း မရှိဘူးသေးဘူးလို့ သိရပါတယ်။