မိုင်ယာမီလေဆိပ်မှာ Amazon Prime Air ကုန်တင်လေယာဉ် ပျက်ကျပြီး အနည်းဆုံး လူ ၅ ဦး သေဆုံး

မိုင်ယာမီလေဆိပ်မှာ Amazon Prime Air ကုန်တင်လေယာဉ် ပျက်ကျပြီး အနည်းဆုံး လူ ၅ ဦး သေဆုံး

စက်တင်ဘာ ၇

အမေရိကန်၊ ဖလော်ရီဒါပြည်နယ် မိုင်ယာမီ အပြည်ပြည်ဆိုင်ရာလေဆိပ်မှာ စက်တင်ဘာ ၆ ရက်နေ့ မွန်းလွဲပိုင်းက Amazon Prime Air ကုန်တင်လေယာဉ်တစ်စင်း ပြေးလမ်းကျော်လွန်ကာ ပျက်ကျခဲ့တာကြောင့် အနည်းဆုံး လူ ၅ ဦး သေဆုံးသွားတယ်လို့ သက်ဆိုင်ရာအာဏာပိုင်တွေက သတင်းထုတ်ပြန်ပါတယ်။

ပေါ်တိုရီကိုကနေ ထွက်ခွာလာတဲ့ Flight 7598 လေယာဉ်ဟာ မွန်းလွဲ ၂ နာရီ မတိုင်မီ လေဆိပ်ကို ဆင်းသက်နေစဉ် ပြေးလမ်းကို ကျော်လွန်သွားပြီး မြေပြင်ပေါ်က မော်တော်ယာဉ်တွေကို ဝင်တိုက်ခဲ့တာဖြစ်ပါတယ်။

ဒီမတော်တဆမှုကြောင့် နောက်ထပ်လူ ၅ ဦး ဒဏ်ရာရရှိခဲ့ပြီး ၃ ဦးကတော့ စိုးရိမ်ရတဲ့ အခြေအနေမှာ ရှိနေတယ်လို့ ဆိုပါတယ်။

လေယာဉ်နဲ့ တိုက်မိခဲ့တဲ့ ကားတွေထဲမှာရော လေယာဉ်မှူးခန်းထဲမှာပါ လူတွေ ပိတ်မိနေခဲ့တာကြောင့် ကယ်ဆယ်ရေးတပ်ဖွဲ့ဝင် ၂၀၀ နီးပါး အရေးပေါ် လာရောက်ကယ်ဆယ်ရှင်းလင်းခဲ့ရသလို လောင်စာဆီတွေ ယိုစိမ့်ထွက်နေတာကြောင့် ညနေပိုင်းအထိ ထိန်းသိမ်းရှင်းလင်းရေးလုပ်ငန်းတွေ ဆက်လက် လုပ်ဆောင်ခဲ့ရတယ်လို့ ဆိုပါတယ်။

လေယာဉ်ပျက်ကျပြီးနောက် မိုင်ယာမီလေဆိပ်မှာ လေယာဉ်ခရီးစဉ်အားလုံးကို ချက်ချင်းရပ်ဆိုင်းခဲ့ပေမယ့် စက်တင်ဘာ ၆ ရက်နေ့ ညနေပိုင်းမှာပဲ ခရီးစဉ်တွေ ပြန်လည်ပြေးဆွဲခဲ့ပါတယ်။

ပျက်ကျသွားတဲ့ လေယာဉ်ဟာ 21 Air က ပြေးဆွဲနေတဲ့ သက်တမ်း ၃၂ နှစ်ရှိ Boeing 767-300 အမျိုးအစား ဖြစ်တယ်လို့ သိရပါပြီး လေကြောင်းစောင့်ကြည့်ရေးအဖွဲ့ Flightradar24 ရဲ့ အချက်အလက်တွေအရ လေယာဉ်ဟာ ပြေးလမ်းကနေ ချော်ထွက်ချိန်မှာ တစ်နာရီ မိုင် ၁၃၀ ခန့် အရှိန်ရှိခဲ့တယ်လို့ ဆိုပါတယ်။

လက်ရှိမှာတော့ မိုင်ယာမီလေဆိပ်တွင်း လေကြောင်းခရီးစဉ်တွေကို ပုံမှန်အတိုင်း ပြန်လည်ပြေးဆွဲနေပြီဖြစ်ပြီး မတော်တဆမှု ဖြစ်ပွားရတဲ့ အကြောင်းရင်းကို ဖော်ထုတ်နိုင်ဖို့ အမေရိကန် အမျိုးသားသယ်ယူပို့ဆောင်ရေး ဘေးကင်းလုံခြုံရေးဘုတ်အဖွဲ့ (NTSB) က ကွင်းဆင်း စစ်ဆေးမှုတွေ စတင်ဆောင်ရွက်နေပါတယ်။

Ref & Photo; Reuters

မြို့တော် News Channel