ခင်ဦးနဲ့ဝက်လက်ကို လေကြောင်းဗုံးကြဲ၊ အရပ်သား ၁ ဦးသေ

ခင်ဦးနဲ့ ဝက်လက်ကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ အရပ်သား ထိခိုက်သေဆုံးမှုတွေ ရှိခဲ့

၂၀၂၆ ဇူလိုင် ၃၁ Myo Taw

ဇူလိုင် ၃၁

စစ်ကိုင်းတိုင်းထဲက ခင်ဦးမြို့နယ်နဲ့ ဝက်လက်မြို့နယ်ကို အာဏာသိမ်းစစ်တပ်က တရက်တည်း လေကြောင်းကနေ ဗုံးကြဲတိုက်ခိုက်သွားလို့ အရပ်သားပြည်သူ ၁ ဦး သေဆုံးပြီး ၂ ဦး ထိခိုက်ဒဏ်ရာ ရခဲ့တယ်လို့ သိရပါတယ်။

ဇူလိုင် ၃၀ ရက်နေ့ ည ၉ နာရီခန့်က ဝက်လက်မြို့နယ်၊ ငါးပတ်ချောင်း ကျေးရွာထဲကို တံတားဦးလေတပ် ကနေ တက်လာတဲ့ ဂျက်ဖိုက်တာ ၂ စင်းက ဗုံး ၄ လုံး ကြဲချ တိုက်ခိုက်ခဲ့တာကြောင့် အသက် ၇၆ နှစ်အရွယ် အမျိုးသား ၁ ဦး ထိခိုက်ဒဏ်ရာရခဲ့ပြီး အခြေအနေစိုးရိမ်ရတယ်လို့ သိရပါတယ်။

“ဦးသန်းလွင်ကို ဗုံးစမှန်တာ ခေါင်းထိခိုက်ဒဏ်ရာ ရတယ်၊ အိမ် ၃ လုံး ပျက်စီးတယ်၊ လူနာက စိုးရိမ်ရတယ်” လို့ ဒေသခံတဦးက ပြောပါတယ်။

အလားတူ ဇူလိုင် ၃၀ ရက်နေ့ နေ့လယ် ၂ နာရီခန့်မှာပဲ တံတားဦးလေတပ် ကနေ တက်လာတဲ့ ဂျက်ဖိုက်တာက ခင်ဦးမြို့နယ်၊ ထနောင်းကုန်းကျေးရွာ အနောက်ဘက် လယ်ကွင်းထဲကို ဗုံး ၃ လုံး ကြဲချခဲ့တာကြောင့် လယ်ကွင်းထဲရှိ အမျိုးသား ၁ ဦးအပြင် နွား ၂ ကောင်ပါ သေဆုံးခဲ့တယ်လို့ သိရပါတယ်။

“လယ်ထဲကို ကြဲတာ၊ နွားတွေကော လူကော ထိတာ၊ ဦးမောင်မောင် သေတယ်၊ နွား ၂ ကောင်လည်း သေတယ်၊ ရွာထဲကျတာမှာ အသက် ၆၀ ၀န်းကျင် အမျိုးသမီးတဦး ထိတယ်၊ အိမ် ၂ လုံး ပျက်စီးသွားတယ်” လို့ ဒေသခံတဦးက ပြောပါတယ်။

လတ်တလောမှာ အာဏာသိမ်းစစ်တပ်ရဲ့ လေကြောင်းတိုက်ခိုက်မှုတွေကြောင့် ဒေသတွင်းရှိ ကျေးရွာတွေ စစ်ဘေးရှောင်ကာ ပုန်းခိုနေကြရပြီး ဇူလိုင်လ ၂၈ ရက်နေ့ကလည်း အာဏာသိမ်းစစ်တပ်က ဝက်လက်မြို့နယ်၊ ပေါက်ကန်ဘူတာကျေးရွာကို ဗုံးကြဲတိုက်ခိုက်ခဲ့လို့ အမျိုးသား ၁ ဦး ဗုံးစထိမှန် သေဆုံးခဲ့ပါသေးတယ်။

မြို့တော် News Channel