တောင်တရုတ်ပင်လယ်မှာ ဖြစ်ပွားခဲ့တဲ့ ပဋိပက္ခကြောင့် သံအမတ်တွေကို တရုတ်နဲ့ ဖိလစ်ပိုင် အပြန်အလှန် ဆင့်ခေါ်

တောင်တရုတ်ပင်လယ်မှာ ဖြစ်ပွားခဲ့တဲ့ ပဋိပက္ခကြောင့် သံအမတ်တွေကို တရုတ်နဲ့ ဖိလစ်ပိုင် အပြန်အလှန် ဆင့်ခေါ်

ဇူလိုင် ၂၁

တောင်တရုတ်ပင်လယ်အတွင်း အငြင်းပွားဖွယ်ရာ ပိုင်နက်နယ်မြေမှာ ဖြစ်ပွားခဲ့တဲ့ ပဋိပက္ခနဲ့ ပတ်သက်ပြီး နှစ်နိုင်ငံကြား အပြန်အလှန် စွပ်စွဲမှုတွေ ဖြစ်ပွားပြီးနောက် တရုတ်နိုင်ငံက ဘေဂျင်းမြို့ရှိ ဖိလစ်ပိုင်သံအမတ်ကို ဆင့်ခေါ်ခဲ့သလို ဖိလစ်ပိုင်သမ္မတ ဖာဒီနန် မားကို့စ် ဂျူနီယာကလည်း မနီလာမြို့ရှိ တရုတ်သံအမတ်ကို ပြန်လည်ဆင့်ခေါ်ထားတယ်လို့ ဖိလစ်ပိုင်သမ္မတရုံးက ပြောဆိုလိုက်ပါတယ်။

ဒီလို အပြန်အလှန် ဆင့်ခေါ်မှုဟာ ဒုတိယသောမတ်စ် သန္တာကျောက်တန်း(Second Thomas Shoal) အနီးမှာ ဇူလိုင်လ ၂၀ ရက်နေ့က ဖြစ်ပွားခဲ့တဲ့ နှစ်ဖက်ပဋိပက္ခအပြီး ဖြစ်ပေါ်လာတာလည်း ဖြစ်ပါတယ်။

ဖိလစ်ပိုင်ဘက်ကတော့ တရုတ်ဘက်က ဖိလစ်ပိုင်ရေတပ်တပ်ဖွဲ့ဝင်တစ်ဦးရဲ့ ဦးခေါင်းကို သစ်သားတုတ်နဲ့ ရိုက်နှက်ခဲ့တာကြောင့် ဒဏ်ရာရရှိခဲ့သလို ရာဘာလှေတစ်စင်းလည်း ပျက်စီးခဲ့ရတယ်လို့ ဆိုပါတယ်။ ဒါ့အပြင် တရုတ်ရဲ့ စွပ်စွဲချက်တွေဟာ မမှန်ကန်ကြောင်းနဲ့ ဖိလစ်ပိုင်ဘက်က စတင်ရန်စခဲ့ခြင်း မရှိဘူးလို့ ဖိလစ်ပိုင်စစ်တပ်က ငြင်းဆိုထားပါတယ်။

တရုတ်နိုင်ငံခြားရေးဝန်ကြီးဌာနကတော့ ပဋိပက္ခကို ဖိလစ်ပိုင်ဘက်က အရင်ဆုံး စတင်ခဲ့ပေမယ့် အခုလို တန်ပြန်စွပ်စွဲမှုတွေ ပြုလုပ်ပြီး အဖြစ်မှန်တွေကို လွဲမှားအောင် ဖော်ပြကာ အခြေအနေကို တမင်တကာ ပိုမိုကြီးမားအောင် လုပ်ဆောင်နေတယ်လို့ တုံ့ပြန်ထားပါတယ်။

တရုတ်ကမ်းခြေစောင့်တပ်ကလည်း ဖိလစ်ပိုင် ရာဘာလှေတွေဟာ တရုတ်ကင်းလှည့်လှေကို ဝင်တိုက်ခဲ့ပြီး တက်တွေ၊ တုတ်ရှည်တွေကို သုံးကာ တရုတ်အရာရှိတွေကို စတင်တိုက်ခိုက်ခဲ့တာလို့ ဆိုပါတယ်။

တောင်တရုတ်ပင်လယ်မှာ ပိုင်နက်အငြင်းပွားမှုနဲ့ ပတ်သက်ပြီး နှစ်နိုင်ငံကြား တင်းမာမှုတွေ မကြာခဏ ဖြစ်လေ့ရှိပေမဲ့ အခုလို သံအမတ်တွေကို အပြန်အလှန် ဆင့်ခေါ်တဲ့အထိ ဖြစ်လာတာကတော့ အတော်လေး ရှားပါးတဲ့ သံတမန်ရေးဆိုင်ရာ လုပ်ဆောင်ချက်ဖြစ်တယ်လို့ ဆိုရမှာပါ။

သမ္မတ မားကိုးစ် အစိုးရလက်ထက်မှာ တရုတ်ဘက်က ဖိလစ်ပိုင်သံအမတ်ကို ဆင့်ခေါ်တာဟာ အခုအကြိမ်နဲ့ဆို ၃ ကြိမ်မြောက် ရှိပြီဖြစ်ပြီး သမ္မတ မားကိုးစ် ဘက်က တရုတ်သံအမတ်ကို ဆင့်ခေါ်တာကတော့ ၂၀၂၃ ခုနှစ်က ဖိလစ်ပိုင်ကမ်းခြေစောင့်တပ်ဖွဲ့ရဲ့ သင်္ဘောတစ်စင်းကို တရုတ်ကမ်းခြေစောင့်တပ်ဖွဲ့သင်္ဘောက စစ်ဘက်သုံး လေဆာရောင်ခြည်နဲ့ ချိန်ရွယ်ခဲ့ဆိုတဲ့ ဖြစ်စဉ်အပြီးမှာ နောက်ဆုံးအကြိမ်အဖြစ် ဆင့်ခေါ်ခဲ့ဖူးပါတယ်။

‌
Ref & Photo; Reuters

မြို့တော် News Channel