ပီရူးမှာ ငလျင် ၂ ကြိမ်လှုပ်ခတ်ခဲ့ပြီး အနည်းဆုံး လူ ၆ ဦးသေဆုံးကာ ၂၁ ဦး ဒဏ်ရာရ

ပီရူးမှာ ငလျင် ၂ ကြိမ်လှုပ်ခတ်ခဲ့ပြီး အနည်းဆုံး လူ ၆ ဦးသေဆုံးကာ ၂၁ ဦး ဒဏ်ရာရ

ဇူလိုင် ၂၀

ပီရူးနိုင်ငံရဲ့ တောင်ထူထပ်တဲ့ဒေသမှာ ငလျင် ၂ ကြိမ် ဆက်တိုက်လှုပ်ခတ်ခဲ့တာကြောင့် အနည်းဆုံး လူ ၆ ဦး သေဆုံးပြီး ၂၁ ဦး ဒဏ်ရာရရှိခဲ့တယ်လို့ ပီရူး အမျိုးသား မြို့ပြကာကွယ်ရေးဌာန အကြီးအကဲက ဇူလိုင်လ ၁၉ ရက်နေ့မှာ အတည်ပြု ပြောဆိုလိုက်ပါတယ်။

အဆိုပါငလျင်တွေဟာ ဇူလိုင်လ ၁၈ ရက် ညပိုင်းမှာ လှုပ်ခတ်ခဲ့တာဖြစ်ပြီး ပြင်းအား ပမာဏ ၅.၁ နဲ့ ၃.၇ အသီးသီးရှိခဲ့ကာ ငလျင်ဗဟိုချက်ဟာ မြို့တော် လီမာရဲ့ အရှေ့ဘက် ကီလိုမီတာ ၃၀၀ (၁၈၆ မိုင်) ခန့်အကွာမှာရှိတဲ့ ဟူနင်းဒေသ၊ ချူပါကာခရိုင်အတွင်းမှာ လှုပ်ခတ်ခဲ့တာလို့ ဆိုပါတယ်။

ပီရူး အမျိုးသား ငလျင်စောင့်ကြည့်ရေးဗဟိုဌာနရဲ့ ထုတ်ပြန်ချက်အရ ပထမအကြိမ် ငလျင်ဟာ မြေအောက် အနက် ၂၄ ကီလိုမီတာ (၁၅ မိုင်) မှာ လှုပ်ခတ်ခဲ့ပြီး ဒုတိယအကြိမ် ငလျင်ကတော့ မြေအောက် အနက် ၁၈ ကီလိုမီတာမှာ လှုပ်ခတ်ခဲ့တယ်လို့ ဖော်ပြထားပါတယ်။

ဥရောပ-မြေထဲပင်လယ် ငလျင်စောင့်ကြည့်ရေးဗဟိုဌာနရဲ့ ကနဦး ထုတ်ပြန်ချက်မှာတော့ ပထမငလျင်ရဲ့ ပြင်းအားဟာ ၅.၆ အထိ ရှိခဲ့တယ်လို့ ဖော်ပြထားပါတယ်။

“ကနဦး စာရင်းတွေအရ နေအိမ် ၄၈ လုံး ပျက်စီးပြိုကျသွားပြီး ၁၈ လုံး ထိခိုက်ပျက်စီးခဲ့ပါတယ်။ ဒီအတွက်ကြောင့် လူပေါင်း ၃၀၀ နီးပါး ဘေးဒုက္ခကြုံတွေ့နေရပြီး ယာယီတဲတွေ ပံ့ပိုးကူညီပေးထားပါတယ်” လို့ ပီရူးအမျိုးသား မြို့ပြကာကွယ်ရေးဌာန ညွှန်ကြားရေးမှူးချုပ် လူးအစ်ဗာစကေးက ပြောဆိုထားပါတယ်။

ဒါ့အပြင် ငလျင်ကြောင့် ပြိုကျကျန်ရစ်ခဲ့တဲ့ အပျက်အစီးတွေအောက်မှာ ပိတ်မိနေသူတွေ ရှိနိုင်သေးတာကြောင့် ဇူလိုင်လ ၁၉ ရက်နေ့ မနက်စောစောပိုင်းကတည်းက ကယ်ဆယ်ရေးလုပ်ငန်းတွေကို အရှိန်အဟုန်မြှင့် ဆောင်ရွက်နေတယ်လို့ ဆိုပါတယ်။

ပီရူးနိုင်ငံဟာ ကမ္ဘာ့ငလျင်လှုပ်ခတ်မှုနဲ့ မီးတောင်လှုပ်ရှားမှု စုစုပေါင်းရဲ့ ၈၅ ရာခိုင်နှုန်းခန့် ဖြစ်ပွားရာ ပစိဖိတ် မီးဝိုင်းဇုန် (Pacific Ring of Fire) ပေါ်မှာ တည်ရှိနေတာလည်း ဖြစ်ပါတယ်။
‌
Ref & Photo; Reuters

မြို့တော် News Channel

#myotawnpt
#Myotaw