ဘန်ဖိုးခရိုင်မှာ ပျောက်ဆုံးနေတာ ၂ ရက်ကြာပြီဖြစ်တဲ့ မြန်မာအမျိုးသမီးကို လည်ပင်းပြတ်ရှဒဏ်ရာနဲ့ သေဆုံးလျက် ပြန်တွေ့

ဘန်ဖိုးခရိုင်မှာ ပျောက်ဆုံးနေတာ ၂ ရက်ကြာပြီဖြစ်တဲ့ မြန်မာအမျိုးသမီးကို လည်ပင်းပြတ်ရှဒဏ်ရာနဲ့ သေဆုံးလျက် ပြန်တွေ့

ဇူလိုင် ၂၈

ထိုင်းနိုင်ငံ ချာချင်ဆောင်ပြည်နယ်၊ ဘန်ဖိုးခရိုင်မှာ ပျောက်ဆုံးနေတာ ၂ ရက်ကြာပြီဖြစ်တဲ့ မြန်မာအမျိုးသမီးတစ်ဦးကို ရုပ်အလောင်းအဖြစ် လမ်းဘေးခြုံပုတ်ထဲမှာ စွန့်ပစ်ခံထားရတဲ့ အနေအထားနဲ့ ပြန်လည်တွေ့ရှိခဲ့ရတယ်လို့ သိရပါတယ်။

သေဆုံးသူဟာ အခင်းဖြစ်ပွားရာ အနီးအနားရှိ ငါးစက်ရုံတစ်ခုမှာ ထုတ်လုပ်ရေးလုပ်သားအဖြစ် လုပ်ကိုင်နေတဲ့ မြန်မာနိုင်ငံသူ မစန္ဒာလင်း အသက် ၂၆ နှစ်ဖြစ်တယ်လို့ သိရကာ လည်ပင်းမှာ ပြင်းထန်တဲ့ ပြတ်ရှဒဏ်ရာ ရရှိထားသလို ဘယ်ဘက်လက်ထဲမှာလည်း ဆံပင်တစ်ဆုပ်ကို ဆုပ်ကိုင်ထားပြီး ရုပ်အလောင်းဟာ ပုပ်ပွနေတဲ့ အနေအထားနဲ့ တွေ့ရှိခဲ့ရတယ်လို့ ဆိုပါတယ်။

သေဆုံးသူရဲ့ မောင်ဖြစ်သူ ပြောဆိုချက်အရ မစန္ဒာလင်းဟာ ဇူလိုင် ၂၅ ရက်နေ့ ညပိုင်းက ဖုန်းပြောရင်း အခန်းပြင်ထွက်သွားရာကနေ အဆက်အသွယ် ပြတ်တောက်သွားခဲ့တာကြောင့် မောင်ဖြစ်သူနဲ့ လုပ်ဖော်ကိုင်ဖက်တွေက လိုက်လံရှာဖွေခဲ့သလို ဖုန်းနဲ့လည်း ဆက်သွယ်ခဲ့ပေမယ့် မရခဲ့ဘူးလို့ ဆိုပါတယ်။

ဇူလိုင် ၂၇ ရက် ညနေပိုင်း အလုပ်သိမ်းချိန် အခန်းကိုပြန်တဲ့လမ်းမှာ မသင်္ကာဖွယ် အနံ့ဆိုးတခု ရရှိခဲ့တာကြောင့် လိုက်လံရှာဖွေရာက လမ်းဘေးခြုံပုတ်ထဲမှာ မြက်ပင်တွေနဲ့ ဖုံးအုပ်ထားတဲ့ မစန္ဒာလင်းရဲ့ ရုပ်အလောင်းကို တွေ့ရှိခဲ့ရတာလို့ ဆိုပါတယ်။

လက်ရှိမှာတော့ ဘန်ဖိုးရဲစခန်းက အခင်းဖြစ်ပွားပြီးနောက် ပျောက်ဆုံးနေတဲ့ အတူလုပ်ကိုင်သူ မြန်မာအမျိုးသားတစ်ဦးကို သံသယရှိသူအဖြစ် သတ်မှတ်ပြီး အမြန်ဆုံး ဖမ်းဆီးစစ်ဆေးနိုင်ရေး ဆောင်ရွက်နေတယ်လို့ သိရပါတယ်။

မစန္ဒာလင်းရဲ့ ရုပ်အလောင်းကိုတော့ ပိုမိုတိကျတဲ့ စုံစမ်းစစ်ဆေးမှုတွေ ပြုလုပ်နိုင်ဖို့ ဘန်ကောက်မြို့ရှိ ရဲဆေးရုံကို ပို့ဆောင်ထားတယ်လို့ သိရပါတယ်။

Ref & Photo; AmarinTV

မြို့တော် News Channel