ရွှေ့ပြောင်းနေထိုင်သူတွေကို လက်ခံကာကွယ်ပေးဖို့ အမေရိကန်ကို ပုပ်ရဟန်းမင်းကြီး လီယို မေတ္တာရပ်ခံ တိုက်တွန်း

ရွှေ့ပြောင်းနေထိုင်သူတွေကို လက်ခံကာကွယ်ပေးဖို့ အမေရိကန်ကို ပုပ်ရဟန်းမင်းကြီး လီယို မေတ္တာရပ်ခံ တိုက်တွန်း

ဇူလိုင် ၄

ပုပ်ရဟန်းမင်းကြီး လီယိုက အမေရိကန်နိုင်ငံ လွတ်လပ်ရေး နှစ် ၂၅၀ ပြည့်အထိမ်းအမှတ်အဖြစ် ဇူလိုင်လ ၄ ရက်နေ့မှာ ပေးပို့တဲ့ သဝဏ်လွှာကနေတဆင့် အမေရိကန်ပြည်သူတွေအနေနဲ့ ရွှေ့ပြောင်းနေထိုင်သူတွေကို လက်ခံကြိုဆိုပြီး ကာကွယ်စောင့်ရှောက်ပေးဖို့ မေတ္တာရပ်ခံ တိုက်တွန်းလိုက်ပါတယ်။

လက်ရှိမှာ အီတလီနိုင်ငံရဲ့ ရွှေ့ပြောင်းဒုက္ခသည်တွေ အများဆုံးဝင်ရောက်ရာ လန်ပီဒူဆာ (Lampedusa) ကျွန်းကို ရောက်ရှိနေတဲ့ ပုပ်ရဟန်းမင်းကြီးဟာ အမေရိကန်နိုင်ငံကို ပေးပို့တဲ့ သဝဏ်လွှာထဲမှာ အခုလို ထည့်သွင်းတိုက်တွန်းထားတာ ဖြစ်ပါတယ်။

လန်ပီဒူဆာကျွန်းဟာ အာဖရိကကနေ မြေထဲပင်လယ်ကို ဖြတ်ကျော်ပြီး ဥရောပဘက်ကို အသက်လုဝင်ရောက်လာကြတဲ့ ရွှေ့ပြောင်းဒုက္ခသည်တွေရဲ့ အဓိကဝင်ပေါက်တခုဖြစ်ပြီး ဒီနှစ်အတွင်းမှာတင် အဲဒီကျွန်းကို ဝင်ရောက်လာတဲ့ ဒုက္ခသည်အရေအတွက်ဟာ ၇,၀၀၀ ကျော် ရှိနေပါတယ်။

ပြီးခဲ့တဲ့နှစ်တုန်းကလည်း ပုပ်ရဟန်းမင်းကြီး လီယိုဟာ အမေရိကန်သမ္မတ ဒေါ်နယ်ထရမ့်ရဲ့ တင်းကျပ်လွန်းတဲ့ လူဝင်မှုကြီးကြပ်ရေး မူဝါဒတွေကို "လူမဆန်တဲ့ လုပ်ရပ်" လို့ ဝေဖန်ခဲ့တာကြောင့် ဒေါ်နယ်ထရမ့်ရဲ့ မကျေနပ်ဖြစ်မှုကို ခံခဲ့ရဖူးပါတယ်။

အခုလည်း ကမ္ဘာကြီးအနေနဲ့ ပိုပြီးလူသားဆန်ကြဖို့၊ စစ်ပွဲနဲ့ ဆင်းရဲမွဲတေမှုတွေကြောင့် ထွက်ပြေးတိမ်းရှောင်နေကြရသူတွေကို ဝိုင်းဝန်းကူညီကြဖို့ ပုပ်ရဟန်းမင်းကြီးက ထပ်မံတိုက်တွန်းလိုက်ပါတယ်။

ဒါ့အပြင် ကက်သလစ်ဘာသာရေးရဲ့ အသက်အိုးအိမ်စည်းစိမ်ကို ကာကွယ်စောင့်ရှောက်ခြင်းဆိုတဲ့ တန်ဖိုးထားမှုထဲမှာ "ရွှေ့ပြောင်းအခြေချသူတွေကို ကြိုဆိုခြင်း၊ အကာအကွယ်ပေးခြင်းနဲ့ ကူညီစောင့်ရှောက်ခြင်း" တွေလည်း အပါအဝင်ဖြစ်တယ်လို့ ပုပ်ရဟန်းမင်းကြီးက ဆိုပါတယ်။

ရွှေ့ပြောင်းဒုက္ခသည်တွေကို ကရုဏာတရား၊ ရက်ရောမှုတွေနဲ့ လက်ခံကြိုဆိုတာဟာ ပရဟိတအလုပ်တစ်ခုတင်မကဘဲ လူသားတိုင်းမှာရှိတဲ့ လူသားဂုဏ်သိက္ခာကို အသိအမှတ်ပြုတာလည်း ဖြစ်တယ်လို့ သဝဏ်လွှာထဲမှာ ပုပ်ရဟန်းမင်းကြီးက ပြောဆိုထားပါတယ်။

Ref & Photo; Reuters

မြို့တော် News Channel