ဂျော်ဒန်မှာ အမေရိကန်တပ်ဖွဲ့ဝင်တွေ သေဆုံးခဲ့ပြီးနောက် အီရန်ကို အမေရိကန် ဗုံးကြဲတိုက်ခိုက်
ဇူလိုင် ၁၉
ဂျော်ဒန်နိုင်ငံမှာရှိတဲ့ အမေရိကန်စစ်စခန်း တိုက်ခိုက်ခံရပြီး တပ်ဖွဲ့ဝင် ၂ ဦး သေဆုံးကာ ၁ ဦး ပျောက်ဆုံးသွားခဲ့ပြီးနောက် အမေရိကန်က အီရန်နိုင်ငံအပေါ် ရှစ်ညမြောက်အဖြစ် ပြင်းပြင်းထန်ထန် ဗုံးကြဲတိုက်ခိုက်လိုက်ပါတယ်။
လွန်ခဲ့တဲ့တစ်လက ချုပ်ဆိုထားတဲ့ ယာယီအပစ်အခတ်ရပ်စဲရေး သဘောတူညီချက်ဟာ ပြီးခဲ့တဲ့အပတ်ကပဲ ပျက်ပြားသွားခဲ့တာကြောင့် အမေရိကန်နဲ့ အီရန်ကြား တိုက်ခိုက်မှုတွေ ပိုမိုပြင်းထန်လာပြီး အလုံးစုံစစ်ပွဲဖြစ်ပွားလာနိုင်ခြေရှိတဲ့အထိ အခြေအနေတွေ တင်းမာနေတာလာည်း ဖြစ်ပါတယ်။
အမေရိကန် စစ်ဌာနချုပ် (Central Command)ကတော့ သမ္မတ ဒေါ်နယ်ထရန့်ရဲ့ တိုက်ရိုက်ညွှန်ကြားချက်နဲ့ ဇူလိုင်လ ၁၈ ရက်နေ့ ညနေ ၆ နာရီမှာ လေကြောင်းတိုက်ခိုက်မှုတွေကို စတင်ခဲ့တာလို့ ထုတ်ပြန်ထားပါတယ်။
ဒီတိုက်ခိုက်မှုဟာ ဟော်မုဇ်ရေလက်ကြားအတွင်း ကုန်သွယ်ရေးသင်္ဘောတွေကို ခြိမ်းခြောက်နေတဲ့ အီရန်ရဲ့ စွမ်းဆောင်ရည်တွေကို လျှော့ချဖို့နဲ့ ဂျော်ဒန်မှာရှိတဲ့ အမေရိကန်တပ်ဖွဲ့ဝင်တွေကို တိုက်ခိုက်ခဲ့တဲ့ အီရန်တော်လှန်ရေးအစောင့်တပ်ဖွဲ့ကို ချက်ချင်းလက်တုံ့ပြန် အပြစ်ပေးဖို့ ရည်ရွယ်တာဖြစ်တယ်လို့ ဆိုပါတယ်။
လက်ရှိမှာတော့ အီရန်ရဲ့ ကမ်းရိုးတန်းစောင့်ကြည့်ရေးနဲ့ လေကြောင်းရန်ကာကွယ်ရေး စစ်ဘက်ဆိုင်ရာ အဆောက်အအုံတွေကို အောင်မြင်စွာ ဗုံးကြဲတိုက်ခိုက်နိုင်ခဲ့ပြီလို့ အမေရိကန်စစ်ဌာနချုပ်က အတည်ပြုထားပါတယ်။
တစ်ဖက်မှာလည်း အီရန်နိုင်ငံတောင်ပိုင်း စီရစ်ခ်မြို့အနီးမှာ အမေရိကန်ရဲ့ တိုက်ခိုက်မှုခံခဲ့ရပေမယ့် လူထိခိုက်မှုနဲ့ အဆောက်အအုံပျက်စီးမှု မရှိကြောင်း အီရန်ရဲ့ မေဟာသတင်းဌာနက ဖော်ပြခဲ့သလို၊ အီရတ်နယ်စပ်အနီးက ရှာဒီဂန်မြို့အနီးမှာလည်း တိုက်ခိုက်ခံခဲ့ရတယ်လို့ တာ့စ်နင်သတင်းဌာနက ဆိုပါတယ်။
ဒါ့အပြင် ဒါခိုဗင်မှာ တည်ဆောက်ဆဲ နျူကလီးယားစွမ်းအင်သုံး လျှပ်စစ်ဓာတ်အားပေးစက်ရုံဝင်းအတွင်း အမေရိကန်ရဲ့ တိုက်ခိုက်မှုကို အီရန်နျူကလီးယားစွမ်းအင်အဖွဲ့က ပြင်းပြင်းထန်ထန် ကန့်ကွက်ရှုတ်ချထားပေမယ့် ဘယ်အချိန်မှာ တိုက်ခိုက်ခံရလဲဆိုတာကိုတော့ တိတိကျကျ ဖော်ပြထားခြင်း မရှိပါဘူး။
အဆိုပါတိုက်ခိုက်မှုတွေကို လက်တုန့်ပြန်တဲ့အနေနဲ့ အီရန်ဘက်ကလည်း ဇူလိုင်လ ၁၉ ရက်နေ့ မနက်အစောပိုင်းမှာ ကူဝိတ်နိုင်ငံမှာရှိတဲ့ အမေရိကန်ရဲ့ အယ်လ်အဒီရီ စစ်စခန်းနဲ့ အလီအယ်လ်ဆလမ် လေတပ်စခန်းတွေကို ဒရုန်းတွေနဲ့ ပြန်လည်တိုက်ခိုက်ခဲ့တယ်လို့ အီရန်စစ်တပ်က ထုတ်ပြန်ထားပါတယ်။
Ref & Photo; Reuters
မြို့တော် News Channel
နိုင်ငံတကာသတင်း
