ထွေ/အုပ် နှစ်ပတ်လည်နေ့အတွက် လုပ်ငန်းရှင်တွေကို ဇမ္ဗူ(ထွေ/အုပ်)က ငွေတောင်းခံနေ

ထွေ/အုပ် နှစ်ပတ်လည်နေ့အတွက် လုပ်ငန်းရှင်တွေကို ဇမ္ဗူ(ထွေ/အုပ်)က ငွေတောင်းခံနေ

နိုဝင်ဘာ ၆

အထွေထွေအုပ်ချုပ်ရေးဦးစီးဌာနရဲ့ (၃၈) နှစ်မြောက် နှစ်ပတ်လည်နေ့ အထိမ်းအမှတ် အခမ်းအနား ကျင်းပနိုင်ရေးအတွက် နေပြည်တော်၊ ဇမ္ဗူသီရိမြို့နယ် အထွေထွေအုပ်ချုပ်ရေးဦးစီးဌာနက လုပ်ငန်းရှင်တွေကို ငွေတောင်းခံနေတယ်လို့ သိရပါတယ်။

အထွေထွေအုပ်ချုပ်ရေးဦးစီးဌာနရဲ့ (၃၈) နှစ်မြောက် နှစ်ပတ်လည်နေ့ဟာ နိုဝင်ဘာလ ၇ ရက်နေ့ မနက်ဖြန်မှာ ကျရောက်မှာဖြစ်တဲ့အတွက် ဒီကနေ့ နိုဝင်ဘာလ ၆ ရက်နေ့ နောက်ဆုံးထားပြီး Kpay ကနေ တစ်ဆင့် ငွေလွှဲပေးဖို့ကိုလည်း ပြောဆိုထားတာ တွေ့ရပါတယ်။

နေပြည်တော်၊ ဇမ္ဗူသီရိမြို့နယ်အတွင်း ထွေ/အုပ်မှ လုပ်ငန်းလိုင်စင်ချထားပေးတဲ့ လုပ်ငန်းရှင်တွေကို ကောက်ခံနေတာဖြစ်ပြီး ယစ်မျိုးလိုင်စင် ရရှိထားတဲ့သူတွေဟာ ငွေကြေးပိုမိုပေးဆောင်နေရတယ်လို့ သိရပါတယ်။

အလားတူ နေပြည်တော်မှာ လုပ်ကိုင်နေကြတဲ့ အိမ်ခြံမြေအကျိုးဆောင် အဖွဲ့အစည်းတွေရဲ့ EC တွေဟာ အလှူငွေ တစ်သိန်းစီ ထည့်ဝင်ရမှာဖြစ်ပြီး အခြားသော ထွေအုပ်လိုင်စင်ရရှိထားတဲ့ အိမ်ခြံမြေ အကျိုးဆောင်တွေဟာလည်း ငွေကျပ် ၅ သောင်းစီ ထည့်ဝင်ပေးဖို့ တောင်းဆိုနေတာကို တွေ့ရပါတယ်။

ငွေပေးချေရာမှာ Kpay နံပတ် 09973944405 သို့ ဒီကနေ့ နောက်ဆုံးထား ငွေလွှဲခိုင်းထားပြီး မှတ်ချက်အနေနဲ့ "ထွေအုပ်" လို့ ရေးခိုင်းထားတာကိုလည်း တွေ့ရပါတယ်။

ပြည်ထောင်စုနယ်မြေ၊ နေပြည်တော်လို နေရာမျိုးမှာတောင် ထွေ/အုပ်လို ဌာနက အခုလို ငွေကြေးပေါ်ပေါ်ထင်ထင် တောင်းခံနေမှုအပေါ် လုပ်ငန်းရှင်တွေအနေနဲ့ မကျေမနပ်ဖြစ်နေကြပြီး အထက်လူကြီးတွေ သိရှိဖို့နဲ့ ကြပ်မတ်ဆောင်ရွက် နိုင်ဖို့ကိုလည်း တိုက်တွန်းထားပါတယ်။

မြို့တော် News Channel